Finland-in Russia nena an ramri ping tan

Finland chuan Russia nena an ramri chu venhimna khauh leh tha zawka kalpui duhin a ping tan a, Russia nena an ramri intawmah 200km laia thui an ping dawn a ni.
Border Guard an siam tur hi 3m (10ft) a sang tur niin a chung berah barbed wire dah a ni dawn bawk.
Finland hian European Union ram zingah Russia nen ramri intawm nei thui berin 1,340km (832 miles) lai a nei a. Tun dinhmun thleng chuan Finland hian ramri hi thing hmangin pin loh aiah a ping mai mai chauh a ni.
Tun hnaiah Ukraine indonaa tel lui tura Russia in thalaite a tihluih duh lova an ram tlanchhuahsana Finland a lut an tam avangin ramri pin hi tul a ti a.
Nordic ram hian Nato alliance zawm a tum hrim hrim bawk a, parliament chuan rang leh chak zawka Nato a zawm theih nan bill chak zawka kalpui tumin Nilaini khan vote lak hman theih a nih rin a ni bawk.
Thawhlehni atang khan Imatra border crossing chu bultan tawh niin ramri bula kawngpui sial leh fence installation te chu March thla tir hian tan zui nghal tur a ni bawk a. Hmun hrang hrangah night vision camera, light leh loudspeaker te dah a ni dawn bawk.
Imatra a ramri hung phui tur hi 3km laia thui niin June thlaah zawhfel hman tum a nih thu Border Guard te chuan an sawi.
Finland hian nikum July thla khan Border Guard Act amendment an lo siam tawh a, hemi hmang hian ramri pin phui chu khauh zawka kalpui tura tih a ni a. A hma zawng chuan ran rual tena ramri an kan loh nana thing mai maia ramri pin a ni chauh thin a ni.
Russia-in Ukraine a run hnuah Finland chuan eastern border chu nasa zawka pin phuia venhim that zual a tum hrim hrim bawk a. Nikum September thla khan Russians thahnem tak te chuan President Vladimir Putin an reservists te Ukraine indonaa tel tura a koh luih duh lovin Finland an lut a ni.
24 February 2022-a Russia-in Ukraine a run hnuah Finland leh Sweden te chuan a rang thei ang bera Nato zawm an dil nghal chuk chuk a, a hma zawng chuan ram pahnihte hi zawl bik leh tan bik nei lo neutral ram an ni.
Stockholm aiin Helsinki chuan Nato zawm tumnaah harsatna a tawk tlem zawk daih a, awlsam zawk taka Nato member a nih vat theih rin a ni a. Finnish leh Swedish ten Nato zawm an tum hi Turkey leh Hungary te chuan remtihna an la pe lo a ni.