Fit tawk loh vanga Adelaide pan ngam lo Djokovic!

Kum 2023-a Adelaide International title latu Novak Djokovic chu tunkara khelh tur Australian Open warm-up tournament atangin a inhnudawk a, he inelna hmachhawn tur hian a taksa lam a la inpeihchhuak lo tih chu a chhuanlam a ni.
Kha mi kum khan Adelaide International title a lak atanga chawlhkar thum hnuah Serb great hian Australian Open trophy a hlawhchhuak a; kuminah erawh kum 38 mi hi Adelaide khaw tournament-ah kan hmu dawn lo a, Grand Slam singles title 25 la tling hmasaber nih tuma a inbuatsaihna kal mekah a thuanawp phah em lo ang chu maw!
Djokovic hian major title 24 a la tling tawh a, chu’ng zinga 10 zet chu Australian Open title niin, heti khawpa a ropuina mualah hian a inlan hnuhnung vawi hnihah semi-final a paltlang zo lo ve ve tlat ta mai a, Grand Slam singles title 25 la tling awmchhun ni chunga chawlh a tumna kawngah Melbourne Park hi a hmangtangkai zo ta tlat rih lo!
World number four Djokovic hian 2023 US Open hnu lamah major trophy a hawn leh ngai ta lo a; a elpui liante’n an chawlhsan zawh tawh lamah record ropui bik nena chawlh tumin major title pakhat tal la beisei zui hram hram bawk mah se hnah thar lo chhuak zelah ngamtu a nei leh tlat zel ta a, tun thlengin a tum a la hlenchhuak zo lo tluang zel rih!
Heti hi ni mah se, Grand Slam title pawh chu la lakbelh thei ta rih lo mah se nikum chhung khan Grand Slam tournament bika player nghet mar berte zinga pakhat a ni a, chu chuan amahah pawh beiseina a siamsak ngeiin a rinawm!
Kum 2025 kan hman liam takah khan Slam paliah semi-final lut kim vekin, French Open leh Wimbledon-ah Jannik Sinner a ngam lo a, US Open-ah Carlos Alcaraz chuan a dangbet bawk.
Nikum January thla khan Melbourne-ah pawh last four match a khelh laiin hliamin a tibuai a, loh theih loha inhnudawh a ngaih tak avangin a tumpui Alexander Zverev khan hahdam zawkin final a luh phah ta a nih kha.
Djokovic hian kum liamta vek khan ATP Tour title pahnih lak belh lehin, a career-ah title 101 a khawl tling hial tawh a ni.
Record siama Australian Open title 10 la tling thei awmchhun Novak Djokovic hian tunhnai khan a thianpa nen inthuruala an din Professional Tennis Players Association a chhuahsan fel hmak tih puang bawkin, an pawl dina a tel duh tak loh chhan chu an inawp dan fel tawk lo leh pawl kalphung, thiltih leh sum lam thlenga langtlang tawk loh vang niin a sawi.
Kum 2011 khan Serb Djokovic leh a thurualpui Canadian Vasek Pospisil-te chuan he player union hi dinin, tunah a dintu pakhat zawk a bang zui ta a ni!