Florida Legislators-5 ten Donald Trump an thlawp

Republican legislators panga chuan Governor Ron DeSantis an thlawpna hnukdawkin President hlui Donald Trump tha tichak turin an thlawp a, hei hi Republican Party-in an party aiawha President chuh tur an zawnna atana Miami hmuna debate an buatsaih hun tur ni hma chiah a thil thleng niin Guardian chuan a sawi a ni. He thil hi kum-2024 a President candidate chan tum Donald Trump tan chuan amah tichak lehzualtu niin tun dinhmunah chuan boruak a nei lian ber a, hetihlai erawh chuan White House luahlum tuma a beihna kawngah DeSantis erawh chuan a hniam phah ve thung a ni. Tuna legislators 5 ten Trump-a an thlawp leh tak nen hian Florida-ah chuan legislators 7 ten Trump-a presidential candidate nih theih nan kawng an sah kuak sak leh tihna a ni a. Report-in a tarlan danin kum 2023 chhung hian Governor DeSantis dinhmun erawhchu zawi zawiin a tlahniam zel ni a sawi a ni.
Kar leh Nilaini lo awm turah khian Republican candidates ten mipui hmaa TV kaltlanga debate an neih thin a vawi thumna ni turin Miami ah an inlan dawn a, hetah hian DeSantis leh candidates pathum te an tel dawn a ni. Amaherawhchu, hemi ni vek hian Trump-a chuan debate-a tel ai chuan Miami-ah tho mipui punkhawmna huaihawt a duh zawk a ni. Trump-a campaign-ah chuan nakin zel ah pawh debate neih zel hi tha a tilo-in tih tawp tawp nise a duh a, hemi ai hian an elpui Democrats te hneh thei ngei tura an theihna te hmang zawk turin a duh a ni. Inrinni kalta a Florida Republicans ten “Freedom Summit” an neih tum khan Trump-a thlawp tlattu mi thar pasarih te tlangzarh a ni a. Heti hian Governor DeSantis thlawptu May thlaa 99 ni thin chu tunah an state atangin 93 an ni tawh a. Thu dawnnain a sawi danin tuna DeSantis thlawptute hian an la thlawp tlat chhan chu an bill put luh mek chu ama thuneihna hmangin a paihthla (Vetoed) mai ang tih an hlauh vanga la thlawp hram hram chauh niin an sawi a ni.