Football atangin Ozil chawl ve ta…

Football atangin Ozil chawl ve ta…
Germany World Cup-winning midfielder Mesut Ozil chuan kum 34 mi niin eizawnna atana football khelh a chawlhsan thu Nilaini khan a puang.
Real Madrid leh Arsenal player hlui hi kum 2014 Brazil ram World Cup-a Germany champion theihna kawnga player thawhhlawk zingah telin, Turkish thi-senkai ni chunga Germany khua leh tui a nihna chuan a football career-ah nghawng nei chho ve rengin, khelmual pawn lamah German pachal diktakte atangin pawm lohna thawm a hre fo a, a chetthat chuan German an ti a, a chetchhiatin mi-khual cham rei, pemlut, Turk an ti leh si tih pawh amah hian a lo sawi-chhuak hial tawh a ni!
Thawk khat laiin Turkish President Tayyip Erdogan nena an thlalak dun chu social media lamah dahchhuakin, Turkish thisena piang a nih vanga chi inthliarna leh zahlohna a tawn fo thu a tarlang tel nghe nghe.
Politik thilah pawh chirhtheh a tawk fo a, kum 2018 khan ram tana inkhelh chu a chawlhsan ta nge nge a, tunah professional football atangin a kalbo ve leh ta a ni.
Instagram kaltlangin a chawlh thu a puang a, “Kum 17 dawn lai professional football player ka ni thei kha hamtha ka inti a, kha hun remchang ka neih avang khan ka lawm a, mahse, kan hnung thla liamta engngemawti chhung khan hliamin min tlakbuak ve ta fo a, ka tana football chawlhsan hun hi a chiang chho ta zel a ni,” a ti.
Turkish club Istanbul Basaksehir-a a hun hnuhnung hmang Ozil hian a club career-ah trophy pakua la tlingin, chu’ng zingah chuan FA Cup pali leh kum 2012-a Spanish La Liga title an lak kha a tel.
Germany tan game 92 khel tlingin, 2014 World Cup-ah a ram a chanpion-pui.
Ozil hian Schalke leh Werder Bremen lamah a club career tir lam tanin, kum 2010 nipui lai khan Real Madrid-ah a insawn a, Bernabeu club a vawn lai hian La Liga, Copa del Rey leh Spanish Super Cup-ah a champion vek.
September 2013-ah a hun laia club record fee (£42.4m)-in Arsenal a zawm a; a season hmasa pahnihah FA Cup lakpui ve vein, a season thumnaah phei chuan ‘player of the season’ atan thlan a ni a; kum 2017 khan Gunners chu cup a lakpui leh bawk.
He playmaker hi January 2018 khan Arsenal chanchina player hlawh hnem ber ni turin kum thum leh a chanve daih contract thar ziahpui a ni a, north London club nen inremna an ziah angin chawlhkar khata £350,000 hlawh tura tih a ni a, hei hi chhiah pek hmaa a hlawh tur a ni.
London club-ah dinhmun ropui luah mah se Arsenal boss thar Unai Emery a lo lang a, duhsak a hlawh lo chho ta tlat a; December 2019-a Emery a chhuah khan Ozil chuan interim boss Freddie Ljungberg hnuaiah khelhna hmun chang lehin, manager nghet atana an lakluh Mikel Arteta duhsakna pawh a dawng zui ta a, mahse, March 2020 khan hripui avangin thla thum chhung ngawt top flight khar a ni.
June thlaa football an khelh leh theih hnuah Ozil chu club tan a inlan lo leh ta a, khelmual lut lo mah se 2020 final-a Gu-nners-in Chelsea an hneh avangin a vawilina atan FA Cup winners’ medal a awrh zui ta tho.
January 2021-ah free transfer-in an thlahtute chawrchhuahna Turkey club lian Fenerbahce a zawm a, mahse, inhriatthiamtawnnain July 2022 khan a contract tihtawp a ni a, Istanbul Basaksehir lamah kal zui nghalin, tah hian hliamin a tibuai a, match riat chiah a khelhsak hman.
Ozil hian international level-ah Germany leh Turkey tan a khel thei ve ve a, a pianna ram tana khelh thlang ta zawkin, world champion a nih phah.
June 2009 European U21 Championship final-a Germany Under-21 team-in England an hneh tum khan ‘man of the match’ niin, khami kum tir lam khan kum 20 mi niin senior national team tan a inlan tan.
Germany player of the year atana vawinga thlan tawh Ozil hi 2010 World Cup leh Euro 2012 semi-final lut German team-ah telin, heti khawp hian a ram behchhan tan thawhhlawk bawk mah se Turkish thisena piang a nihna hian a career-ah inthliarna leh zahlohna a pumpelhtir thei bik chuang lo!