Football khawvela Vini thlavang hauh thawm a ring

Football khawvela Vini thlavang hauh thawm a ring
Thawhlehni zana 2024 Men’s Ballon d’Or award sem chuan boruak a nei zui zel a, mi rinkai leh amah leh a team Real Madrid lam pawhin dawng ngei tura an beisei Vinicious Junior chuan dawng loin Manchester City midfielder Rodri kuta hlan a ni a, a vun rawng avanga hmusit leh diriam tawk chamchi Vini thlavang hi football khawvelin a hauh na hle a, a khelhna Bernabeu club phei chuan award sem hi an boycott hial a, club of year lawmman leh manager of the year award pawh a hmunah an dawng lo!
Football khawvel tih mai pawh a tawk zo lo a, sports khawvelin Vinicius Junior hi an thlawp a tih theih a; an ram Brazil lamah pawh Vini aia Rodri vote hmu tam zawk demna thu na takin an auchhuahpui bawk.
Vinicious-a Real Madrid team-mate rualkhat – Eder Militao, Eduardo Camavinga leh Aurelien Tchouameni-te chuan social media lamah Brazilian fakna an tarchhuak a, tunlai taka khawvela player tha ber a nih thu an sawi hlawm.
Militao chuan X-ah ti hian post a siam a, “I tha ber a, tumahin i chawimawina dawn tur hi an chhuhsak tur che a ni lo asin!” tiin!
Camavinga pawhin, “Fotball politik vang phiangsenin maw! Ka unaupa, khawvelah i tha ber tho tho. Eng award mahin i thatberna hi a hliah theih lo. Love you my bro,” tiin a ziak.
Tchouameni pawhin a hlawhchhuah zozaite chu award dawn lohin a tihhniam mai mai theih loh a nih thu a sawi.
Norwegian chess legend Magnus Carlsen pawh a ngawi mai mai thei bik lo a, social media lamah kum 24 mi Vinicius Junior-a thlalak pholangin, medal emoji a dah tel.
Brazil rama an journalist leh politician langsar ber berte pawh Vinicius Junior aia Rodri thlan a nih chungchangah an lawm lo a, vun hang Vini vote hmuh tam ber loh chhanah Spain rama vun rawng avanga chi inthliarna a do nat em avangin Ballon d’Or thlangtu Fifa ranking-a top 100 chin ram atanga journalist thlan bikte’n an lawm loah an ngai!
Brazil forward Vinicius hi season liamta khan Real Madrid top scorer niin, Spanish giants chu Champions League leh La Liga lamah a champion-pui a; award dawng tura thlan Manchester City Spaniard midfielder Rodri pawh khan kumin July thla Euro 2024-ah a ram champion-puiin, City chu a zawna a vawilina atan Premier League a lakpui bakah Uefa Super Cup leh Club World Cup trophy a lakpui bawk.
Spaniard pawh kha awm-khan ve tho bawk mah se Vinicius ringtu an thahnem a, an beisei anga a dawn leh tak si lohah chuan Brazilian news commentator-te pawh an ngawi mai mai thei bik lo a, vote thlaktute thutlukna chu fair lo leh dik lo an tih thu sawi hlawmin, a duhthawh zual phei chuan tun kha he award history-a thutlukna sawisep kai ber ni hialin an chhuah!
Brazilian TV news network Globo News commentator Guga Chacra an tih chuan, “Vinicius hi vun rawng leh chi avanga Spanish football leh Europe hmun dangah pawh mite perh hlawh ber a ni tih kan hre vek a, racism dotu langsarberte zinga mi a nih avangin tuntuma Rodri vote hmuh a phak loh chhan pawh hi ‘racism’ a tawrhna kal zel a ni,” a ti hmiah!
Brazilian daily Estadao-a an sports editor Gustavo Faldon pawhin, “Vincius laka an chet duh dan hi Ballon d’Or chanchina hleih neihna (injustice) lian ber a ni.
“Award a dawn zawh loh chhan hi Real Madrid tana khel Brazilian a nih vang a ni,” a ti a; ESPN Brasil sports commentator Rodrigo Bueno pawhin inthleithlakna nia a ngaih thu a sawi ve bawk.
Brazil rama UOL news website sports commentator Milly Lacombe pawhin a duhthawh hle a, Ballon d’Or chuan season khat chhunga mite sawi nasat ber player laka rorelna dik lantirna hun tha an bawhpelh nia sawiin, lehlam pawl a bum theihna te, a goal thun theihna leh game-a hun pawimawh changtu a nih thinnna bakah football-a chi inthliarna lam dotu langsar a nihnate chu engmah loah an ngai niin a sawi.
Ballon d’or award-te hi France Football (magazine) buatsaih niin, top 100 Fifa-ranked luahtu ram atanga journalist thlanchhuahte thlan thin a ni.
Journalist tinte hian nominee 30 thlanchhuahte atangin player 10 theuh an thlangchhuak a, chu’ngte chu 10-na atanga pakhatna thlengin an duhdanin an remchhuak leh thin.
Brazilian sports commentator hraw berte zinga mi Galvao Bueno chuan follower maktaduai chuang a neihna a YouTube channel-ah Ballon d’or thlan dan a sawisel a, “Football thil pawh a ni tawh lo. Tunge khel tha tih lam pawh a ni lo. He award ve hi Europe mite duhsakna (European bias) lek a ni,” a ti hmiah!
Bueno hian sawizawmin, Vinicius-a’n vote a hmuh san ber loh chhan kha racism a do vang niin, a chet dan khan mi awm a tinuam lo niin a sawi.
Sawiselna nasa tak a rikchhuah nuai nuai hnu hian France Football editor-in-chief Vincent Garcia a tawngchhuak a, French newspaper L’Equipe hnenah vote tlemte chauha inhneh an nih thu sawi chungin, “Vinicius khan top five-a Bellingham leh Carvajal lang ve kha chhiarkawp dana chhutin a tuar a tih theih a, kha khan a point hmuh tur tlem-a-zawng a tihkiam phah a ni.
“Real season a tha a, an player pathum pali lai an lang a, judge-te’n club khat player-te atangin an duh an thlan a ngai a, chu chu Rodri hian a hlawkpui ta a ni,” tiin rinkai ber zinga mi Brazilian tlin loh chhan a sawifiah.
Commentator tam ber chuan kuminah Vinicius aiin Rodri khel tha zawkah an pawm thei lo a, khelmual chhung leh pawna mihangte hmusitna a do nat em avangin mingo vote thlaktute’n a lakah vote an pe tha duh lo tih chu an ngaihdan pui ber a ni.
Ballon d’Or result puan a nih hnu khan Vinicius chuan X-ah post dahchhuakin, racism dona chu tawpsan a tum loh thu leh a tul phawt chuan vawi 10 pawh message a dahchhuak leh dawn tih a sawi a, nasa takin do mah se mite chu he thilah hian an la harhchhuak tak tak lo niin a sawi.
X-a a post hian reiloteah comment 100,000 a dawng nghal a, a tam ber chu Brazilian thlapwna thu a ni.
Brazil minister of racial equality Anielle Franco pawhin message dah vein, “Vini, i va ropui em! Racism hian kan kawng min dal ngai lo ang. History i siam chhunzawm zel ang aw…” tiin.