By: J. Lalsangliana
6th Semester,
Govt. Johnson College, Aizawl
-- Advertisement --
Genesis 1:29 Tin, Pathian vêkin, “Ngai teh u, lei chung zawng zawnga thlai chi nei awm tinrêng leh thing tinrêng, thing chi nei rah awmnate chu ka pe che u a ni; in chaw atân a ni ang; a ti a.
‘FOREST’ hi mizo tawng chuan Ramhnuai emaw Ramngaw tiin kan sawi thin. Tin, Ramngawah chuan Rualbanlo ni hauh si loin tawngthei lo, thilnung tam tak an awm a, chung thilnungte chuan ngawi rengin keini mihringte tan hian hna ropui tak an thawk a, an hnathawh chu a tak hmuh tur awm lo mah se, kan rilru leh taksaah a lang chhuak thin.
‘Forest’ hi kan dam khawchhuah theih nana kan mamawh/châk kan lakna hmun a ni a, nung dama mihring kan awm theih nan hriselna kan mamawh a, chuvangin ‘forest’ chu kan nunna hnar ti ila a dik viau ang.
Hriselna (Health) chu mihring damlaiin kan mamawh a, kan hrisel loh chuan kan dam rei thei lo. Kan taksa hian hrisel tur chuan ei leh in tur a mamawh a, chutiangin kan rilru pawh a hrisel thin. Hriselna tura kan taksain a neih ngaite hi kan Lo/Rama thing leh thlaite atanga kan hmuh a ni tlangpui thin.
‘FOREST’ A|ANGA HRISELNA KAN DAWN TE.
Mihringte hian nung turin Boruak tha, tui thianghlim, chaw hrisel kan mamawh a, heng kan hmuhna hnâr chu ramhnuaia thil awm, hnim, thing leh mau, theirah leh thlai atang tein a ni.
THING LEH MAU, THEI LEH HNIM TE HIAN: –
1. Kan Boruak tha (oxygen) hip luh tur an siam a, kan boruak chhe thawk chhuah(carbon dioxide) an lalut ve thung. Mihring tana chemical hlauhawm lei leh tui chhung ami an hip ral thin.
2. Chaw tha leh hrisel tak min hlui a, thei rah leh thlai hrisel tak kan hmuhna hnar a ni.
3. Hah ti dam thei chhemdamthli a siam a, chawlh nan zar hlim, dâi nuam tak min pe.
4. Tui hna siamtu leh ti thianghlimtu a ni.
5. Inenkawlna Damdawi leh Ramhmul damdawi kan neihna ber a ni.
A |ANGKAINA DANGTE
6. Kan nun khawsak nan Ramhnuai atangin thil hlu tam tak kan la chhuak thin. e.g. Thing tuah, hmanrua leh thil hlu tam tak.
7. Lei tinghettu an ni a, leimin tur an veng.
8. Ramhnuaia nungchate an chawm thin
9. Sava hram ri te, thereng chi leh rimawi zangkhai tak tak hriat tur a awm a, kan rilru tihriseltu a ni.
10. Ri bengchheng lutuk tur lakah leh thlipui lakah min veng.
HRISELNA CHAW |HA A SIAM
1. CARBOHYDRATE- Thahrui siamtu leh natna laka ralthuam siamtu a ni, chu chu heng, thei rah, thei tui, buh, chhang, bal, vaimim, thil thlumlam chi atang tein kan dawng.
2. PROTEINS- Kan taksaa pem leh hliamte siam thatu a ni a, (Naupang)|hanna siamtu a ni. Thlai mu, bean leh be lam, bekang sa, atang tein kan dawng.
3. VITAMINS- Taksa ral do khawl siam tu, rilru hmasawnna leh taksa thanna siamtu a ni a, thlai hring, be lam chi leh thei rahah te kan hmu thin.
4. MINERALS- Kan ruh tinghettu leh tichaktu a ni a, thlai leh thei rah ah te kan hmu thin.
A HLUTNA ZAT TEHIN
Mizoram CCF Planning and Chief Wildlife Warden thin, Dr. N.S Bisht khan a lehkhabu ziahah khan Mizoram ramngaw atanga thil hlutna hmuhchhuah zat chu kumkhatah cheng vaibelchhe 515.35 man hu angin a chhutchhuak a, ram hmul lakkhawm atanga sum lut zat hlutna pawh hi cheng vaibelchhe 25.14 a ni. Boruak a siamthatna leh mihringte hriselna atana a hlutna hi cheng vaibelchhe 16.95 a ni a, natna hri thalo laka min venhimna kawng a a hlutna hi cheng vaibelchhe 0.57 a chhut a ni bawk.
Heng a hlutnate hi sum a kan lei ni loin, a thlawna kan dawn a ni.
KHAWVEL TUKVERH A|ANGIN
Khawvel ramngaw kan la neih Food and Agriculture Organization Of The Nation in a tarlan danin kan lei zau zawng 31% hi forest a ni a, 420 MH (million hactare) hi kan khawih chhiat zat a ni, “World Health Organization” chuan ramngawa thil awm kan tihchhiat avanga Boruak chhe insiam hian kum tin mi maktaduai 4.2 a tihlum thin niin a tarlang.
Kum 1997-a Indonesia ramngaw chhah tak mai chu lo neih nan an hal tak tak mai a, Malaysia leh Singapore thlengin chhum dum chhah tak a insiam a nih kha, thlai leh thei a rah thei lo a, a tlântu thilnungten an tuar a, mi tam takin natnate veiin an thih phah a, tamtak hriselnaah a nghawng thui hle.
Kum 2019 January atanga October thla thleng khan Brazil, Uruguay, Peru, Bolivia chhunga Amazon ram ngaw chhah tak mai chu a kang duai duai mai a, he ram kang nasa tak mai hian,boruak chhia, tam tham tak a siam a, a chhunga cheng thilnungten an tawrh phah nasa hle a ni, nausen leh kum 60 chunglam mi 1000 dawnin thawk lamah harsatna an neih phah bawk.
MIZORAM DINHMUN
Kan ram hi Tlang ram awih tak ni mahse kan vannei khawp a, thing leh mau, thlai leh tual to chi hrang hrang kan ngah khawp mai. ndia ram puma ramngaw nei tha pahnihna kan ni a, 85.41% hi ramngaw kan la nei. Hei vang chiah hian boruak tha leh tui thianghlim kan hnianghnar phah a ni.
Mithiamte chhut danin thing pangngai kum 50-a upa hian oxygen chêng nuai 5.5 man hû vêl a pe chhuak thei a. Thing puitling pangngai 30-50 ft. hian air conditioner 5 vêl hena chhût a ni bawk. Mizoramah hian ramngaw chhah tha tih tlâk 3158.57 sq.km (14.98%) leh ngaw pangngai 2628 sq.km (12.46%) chauh kan nei tawh. Ramngaw kan thiah leh hâl vangin Mizoramah lei tha kum tin ton 10-20 luang ral zêl ang a ni.
Kan rama (forest) thil hlu awmte hian kum tinin chhiat lam a pan mek zel a, Kum 2000-2020 thleng khan 40.00(hectare), za zela 2.0(%) chu kan khawih chhia a. Hei vang hian sik leh sa a danglam phah nasa hle a ni.
Kan ramin chhiat lam a pan mek avangin kan hriselna paw’n a tuar phah zel a, kan taksa leh rilru hriselna a hniam zel tih kan ngaihtuah pha tawk lo a nih loh vek chuan, kan hlamchhiah/ngaihthah thin a ni ang e. Kan ramngaw chhiat chhan leh hrisel nana a nghawng dante chu hlawm hnihah then ta ila.
1. Leilung/Khuarel chhiatna:- Khuarel chhiatna hi tuma dan theih a nih loh bakah a thlen hun tur hriat fak theih a ni lo, heng chhiatna thlengte avang hian mi tam takin harsatnate tawh phahin nunna hial an chan phah thin. Chung chhiatnate chu lirnghing, tlangkang, tui lian, khawkheng, leimin, thli tleh etc.
2. Mihringte kutkem/khawih chhiat:- Kan rama thil hlute hi khuarel chhiatna ai mahin, mihringte khawihchhiat hi a tam zawk a, kum 2000 atanga 2020 inkar chhung khan 16.6kha (kilo hectare) a zau ramhring kan siam chhuak a, 57.1kha lai kan hmangral thung, kan tih chhiat tawh zawng zawng hi 864kha a zau a ni.
FOREST CHHIAT VANGA NATNA THLENGTE
Black Death — Uihli chikhat sazu atanga natna rawn piang
Spanish Flu — Hritlang chikhat inkai chhawn awlsam tak.
HIV — Taksa raldo khawl tichhe theitu natna
Rabies —lu na, khawsik etc, ramsa chil atanga natna.
Malaria — thosi seh atanga natna, hritlang khawsik,nguai.
Salmonella — kawthalo, khawsik,luna etc
Sars — khawsik, luna, thawk lam harsatna nei.
Ebola — hritlang, luakchhuak,luhai etc
HMAN ZAWH THEIH A NI, PHUN BELH A, CHÎN BELH A NGAI
Hriselna kawnga a nghawng dan chi hnih, kawng khata tha viau a lang si, kawng dang thlira tha si lo (Impact of Paradox).
Forest (ramngaw) hi kan ni tin mamawh kan hmuhna hnar a ni a, kan hrisel nana chaw tha, damlo tana damdawi, kan taksa mamawh Boruak leh tui thianghlim kan hmuhna a ni a, chuvangin hriselna min pe tu dik tak a ni. Hetianga hriselna kan dawn si chuan kawng dangah engtin nge harsatna a siam? Ni e, pawisa pawh kan hman zawh tawh chuan kan thawh chhuah leh a ngai thin ang chiah hian hetia kan ramngaw a kan mamawh damdawi,ei in tur leh thil siam nana kan hmante hi kan tana hriselna thlentu a ni ngei a, nimahse a chi dah lo a kan phun/tuh belh loh chuan, kan hmang zo thuai ang a, a lang lo ruamah (Boruak leh tui thianghlim tlakchham) kan tawrh phah thei, a pawi tak tak hun kan nghah chhungin khua kan tlai zo ang tih a hlauhawm khawp mai. Chubakah kan hriselna siamtu damdawi lakna kan nei tawh lo bawk ang, loh theih loh hun nghah hi a pawi thin.
Thil chiang ta em em chu ‘forest’ hian kan mamawh bulpui ber chaw, tui leh boruak a siam a, chaw tui leh boruak chuan kan hriselna a siam leh a, hriselna rah chu damna a ni. Hei hian kan inzawmna thukzia a tichiang hle awm e.
Keini Zo hnahthlak chhuantharte hian, thiamna leh finna rah duhawm tak kan seng mek a, kan thlahtu hmasa zirna leh thiamna lama la hniam ve tak takte ramngaw tihchhiat siam tha turin kan thiamna leh hriatnain a tlin a, kan theihna hi kan hmang ngam dawn lawm ni. Hriselna siamtu kan hria a, hriselna tichhetu pawh kan hre ta.
Vai thang kama kan buai lai reng hian, kan awhna thang valh kan siam ve mek a, a hun leh hmun taka kan awh loh nan kan chhungkua, khawtlang leh ram tan tiin kan damchhung ngei hian kan tihchhiat tawhte siam that hna chu Taima takin thawk ila, midang tana malsawmna thlentu kan ni ngei ang a. Buh chi pakhatin rah tam a chhuah thei a, tupawh a thinlunga hmangaihna nei chuan he lei chunga a thiltih that pakhat rah chu a pung seng tur a ngah viau awm si a.
RILRU HRISEL TAKA A RAM (FOREST) HMANGAIHTU THINLUNG CHU A MAWIIN A VA ROPUI EM.
(He article hi Mizoram EIACP Hub, Mizoram Pollution Control Board-te’n International Day of Forests denchhena Mizoram College Eco-Club-te tana Online Article Writing Competition a buatsaiha lawmman pakhatna dawngtu a ni.)