Four lane laih leh hnathawh dan thlirho
Mizoram Pro-Active Governance and Timely Implementation (Mi-PRAGATI) chu a vawi 4-na atan an chairman, chief minister Lalduhoma kaihhruaiin Ningani khan an thukhawm.
Aizawl Western Side By-Pass Road laih meka harsatna awm – dumping site, zangnadawmna la tihfel loh, raltlante awmna sawn leh forest clearance an sawiho a. Hnathawh dan tur tihdanglam ngai (change of scope) awmte pawh sawi a ni.
Vairengte – Sairang Section of NH 306 & 06 (four lane) hmalak mek an thlirho a. Thutkhawm hnuhnung ber leh tun inkarah hna hi zaa 2-a hma sawn hman a ni sawi a ni.
Tun thlengin packag-III chinah hna zaa 19.25 zawh a ni tawh a, package-IV ah zaa 17.82, package-V ah zaa 14.90 package-VI ah zaa 8.76, package-VII ah zaa 13.67 leh package-VIII ah zaa 14.12 thawh a ni tawh. Hmun thenkhatah ram neitu nih inchuhna court thubuai a awm a, court thutlukna nghah mek a ni. Tuna kawng awmsa hi ‘short term maintenance contract’ hmanga siam mek a ni a, hna thawh tur chin an zo tep tawh.
Ekta Mall sak mek chu tluang taka kalpui a ni a. Overall physical progress zaa 21 a ni tawh tih report a ni. Tunah hian an hmanrua endikna tur laboratory an bun fel tawh a, an hmanraw mamawh leh khawl mamawh zawng zawng an la khawm tawh tih sawi a ni.
Neihloh khaw sawn chungchangah tunah hian chhungkaw engemawzatin an in thar tur an sa tan tawh a. Vantlang hmunhma pawimawh din hna pawh thawh tan thuai theih beisei a ni. A panna kawng fomation cutting zaa 90.93 zawh a ni tawh.
Khamrang – Selesih kawng laih meka harsatna awm sawi a ni bawk a. Forest clearance chungchang, public interest litigation lut chungchang leh zangnadawmna lama harsatna awmte sawi a ni. A thawhna sum NABARD RIDF hi a tawp tawh avangin he kawng hi thawk zui zel tur chuan state sawrkar sum hman a ngai tawh dawn a ni.
Sihhmui kawngpui atanga rel station panna kawng tihzauh leh Suaka Cricket Stadium panna kawng siam chungchang an sawi a, a rang lama bawhzui nise, a ti.
Thutkhawmah hian a kaihhnawih minister ho bakah chief secretary leh sawrkar hotu dangte an tel.