France an chak zel

Euro 2024 khel tur zawnna neih mekah Group B-a hmahruaitu France chuan Thawhtan zan khan an hnuai chiaha awm Greece chu Kylian Mbappe goal thun hmangin an hneh a, hma an hruai fal deuh deuh zel.
Player tha tak tak kawl khawmtu France hian Stade de France, Saint-Denis-ah Greece an mikhual a, an mualah khel tha viau mah se goal khat bak an thun thei lo. He inkhela goal awmchhun hi minute 55-naah penalty atang Kylian Mbappe thun a ni. France goal neihchhun thuntu Mbappe hian season kal mekah club leh ram tan goal 54 a thun tling chiah a. France player zingah season khata goal thun hnem ber ni thin Just Fontaine record a khum a, French record thar a siam.
Greece an hmahchawn tum hian France tan Kolo Muani leh Jules Kounde ten goal thun theihna hun tha nei mah se an chhawr tangkai zo lo. Minute 69-naah Greece player Konstantinos Mavro-panos hnawh-chhuah a ni a, tam zawk an nih hnu pawhin France hian goal an thun belh thei chuang lo, Goal thun belh thei lo mah se an mamawh point thum an hmu tho thung.
Euro 2024 khel tur zawnnaah France an khel tha tluang viau a, vawi li khel tawhin an la chak vek. World leh European champion hlui France hian point 12 hmuin Group B-ah hma an hruai a, an hnuai chiaha awm Ukraine nen point rukin an inthlau mek. Group B-ah elpui hautak ni tura ngaih Netherlands chuan UEFA Nations League semi-final an khelh vangin vawi hnih chauh an la khel a, point thum hmuin palinaah an awm mek.
Thawhtan zana Group inkhel dangah Republic of Ireland chuan Aviva Stadium, Dublin-a an mikhual Gibraltar chu si thum faiin an hneh a, point thum an hmu.
Republic of Ireland hian an group mawngphaha awm Gibraltar lakah chawlhlawk hmain goal an thun thei lova, second half-ah goal thum ngawt an thun thung. Michael Johnston chuan minute 52-naah hmahruaina goal a thun. Hmahruaina goal an thun atanga minute sarih hnu lekah Evan Ferguson chuan an goal hnihna a thun a. An goal thumna hi minute 90+2-ah Adam Idah thun a ni.