England forward Marcus Rashford chu Manchester United in contract thar ziak turin an dawr a, contract thar chungchangah an inrem thei tep tawh niin tarlan a ni a. Rashford hian contract thar a ziak a nih chuan United player hlawh hnem ber a ni dawn.
Season liam ta khel tha tak Rashford hi United chuan kar khatah £375,000 hlawh turin an dawr a, contract thar a ziah rualin United player hlawh hnem ber ni thin David Gea a lehpel dawn. Si nghak David de Gea hian kar khatah £375,000 hlawhin, United player hlawh hnem ber a ni mek a, a contract hi June thla tawp rualin a tawp tawh dawn thung. United chuan an si nghak De Gea hi contract thar zawrh bawk mah se a hlawh an tihhniamsak dawn a. Contract thar chungchangah an inrem thei a nih pawhin De Gea hian kar khatah £200,000 bak a hlawh tawh dawn lo.
United hian an si nghak David de Gea hi contract thar ziahpui pawh ni se first choice a ni ngei ang tih an tiam thei tawh lo thung. Red Devil hian si nghak thar lak tur an dap mek a. Everton leh England si nghak Jordan Pickford an ngaihven mek a. Pickford hi kar khatah £200,000 hlawh turin an sawm a, a manah £45million sen an hreh lo. Jordan Pickford an la thei lo a nih pawhin Brentford si nghak David Raya chu lak tumin an ngaihven tel bawk.
United player hlawh hnem ber ni thuai tura ngaih Marcus Rashford hi season liam ta khan a khel tha hle a, United tan inelna hrang hrangah goal 30 zet a thun. A chetthat vangin Europe club lian tak tak ten lak tumin an ngaihven hlawm. Club lian dangin an ngaihven vangin United hian contract thar ziahpui thuai thuai an duh a, an player hlawh hnem ber ni tura tawktarh siamin, inremna an nei thuai tura ngaih a ni.
Rashford tan contract thar a hnai
Get real time updates directly on you device, subscribe now.
Prev Post
Next Post