Khawvel badminton map-a Mizoram tarchhuaktu Zuala leh Sanga

Khawvel badminton map-a Mizoram tarchhuaktu
Zuala leh Sanga
October ni 13-19 chhung awh tur National Centre of Excellence, Guwahati-a khelh mek Yonex Sunrise BWF World Junior Championships 2025-ah Mizo rawlthar pahnih C. Lalramsanga leh H. Lalthazualate chuan India tan team bronze medal an hlawhchhuak tawh a, badminton thiam ram India tana medal hlawhchhuak thei Mizo shuttler pahnihte hian khawvel badminton map-ah Mizoram hming an tarchhuak ta a ni.
Junior Worlds kal mekah hian state 13 atanga player thlanchhuahte’n Indian contingent ai an awh a, khawvel huap badminton inelna liana Mizo player pahnih an lang ve ringawt pawh hi Mizoram badminton tan mellung pawimawh a ni.
Zuala zinkawng
Kum 2010 daih tawh khan Aizawl Chanmari West veng pa H. Zohmangaiha chuan badminton khel turin an in atanga hnai ber hall a pan thin a, a fapa hian ngawi rengin a zui ve hnak hnak thin.
Ni khat chu a fapain a racquet a lo hmang ru lai chu a hmu fuh a, mahse, hau ta mai lo chuan badminton khelh dan a zirtir ta zawk a…
October ni 13, 2025, Thawhtanni a herchhuah meuh chuan rawlthar kum 18 mi ni ve ta H. Lalthazuala chuan BWF World Junior Championships-ah a debut a nghakchhuak ta reng mai a; National Centre of Excellence, Guwahati-a a bultanna inkhelah Uganda player Denis Mukasa laka harsatna lian tawk loin 15-4, 15-4 hnehna nen si-ngles first round a tlingtla phawt.
Racquet hum aia football boot bun ngaina tam zawkna Mizoram atanga chawrchhuak Zuala hian khawvel huap inelnaa a match hmasaberah hnehna chang mah se tah chuan lungawina a la hmu awzawng lo a, “Tuna ka dinhmun hi ka lo mangphan thin kha a ni ngei mai a, mahse, a la tawk lo a, hei aia sang hi ka la duh a ni,” a ti chhar chhar!
Kum 2025 hi Lalthazuala tan kum pawimawh, mellung thar phun kum a ni.
Kumin July thla pawh khan India aiawhin Asian Junior Championships a lo khel tawh a, round of 32 a thleng nghe nghe. Junior Worlds kal mekah pawh he stage bawk hi a thleng leh ta phawt a ni.
A pa hnena Zuala’n tih takzeta badminton luhchilh a duh thu a hrilh lai khan kawng a awlsam dawn lo tih an chiang dun a, he sport behchhana badminton thiam India rama elpui an ngah turzia leh Mizoram chu badminton hotspot atanga hla tak a nih thu pawh an chiang dun hle!
A pa Zohmangaiha chuan YouTube atangin training video-te a han khawnkhawm a, chu mi leh a tawnhriat hmangin Zuala leh a farnu Rinhluite chu badminton a zirtir thin a, training chu an chhungkaw tan chona lian a ni.
Zuala chuan Mizorama badminton dinhmun sawiin, thalai lamin an khelh tam loh thu leh kum upa lamin hobby leh hrilselna atana an khelh tam ber thu leh naupang zawk tana court chan ve pawh a harsat thu a tarlang a, “Inkhelhna tur hmun chan mai a harsat avangin stadium (hall) pakhat atangin stadium dang kan pan lehte a ngai thin a, court ruak zawn hi hna khat a tling ve a; chuti chuan harsa takin ka pa hnuaiah ka inzir ve thin,” a ti.
A pa hnuaiah training hmasa lam kalpui thei ngawt mah se badminton chu sum ngai ve tak game a nih avangin sum lam harsatna hmachhawn tur an nei tel a; Zuala nu F. Lalawmpuii hi Directorate of Urban Development and Poverty Alleviation hnuaia thawk a ni a, chu chu sum lama an innghahna lian pakhat a ni.
Kum 2018 khan Tata Trust puihnain Mizoram State Sports Council, Mizoram Badminton Association leh Pullela Gopichand Badminton Academy (PGBA)-te thawkho chuan Mizoram Badminton Grassroots Programme hnuaiah Regional Development Centre chu Aizawlah an rawn hawng ta hlauh a, chu chu Zualate chhungkaw tan malsawmna a lo ni ta a, “Chu hmunah chuan coach pahnih Eddie leh Ponty hnuaiah kan inzir ve tan thei ta a ni,” Zuala chuan a ti.
Kum 2021 a herchhuah meuh chuan ITM Academy, Raipur-a zir tura thlan a ni ta hial a, tah chuan Badminton Association of India general secretary Sanjay Mishra chu chief mentor a ni a, a kiang hnaia awmte pawh an hraw ta hraih mai!
Kum hnih a liam leh chuan PGBA, Hyderabad-a training chhunzawmna hun remchang a tawng leh ta zel a; kha mi kum vek khan Jwala Gutta Academy-ah Under-17 Boys’ Singles title a hlawhchhuak a, Mizoram atanga Junior National Championship title la thei hmasaber a ni ta hial a; tunah khawvel huap badminton medal awrh thei hmasa pahnih zingah a tel zui leh ta a ni.
Zuala chuan, “Mizoram atanga chhuak ni chunga international huapa hlawhtlinna sualchhuah chu kan state association bakah kan nu leh pa leh mi tam takin min lawmpui a, heti taka kan hlawhtlinnain a tihhlim chhan hi Mizorama badminton a lar loh vang a ni.
“Tunah chuan kei leh Sanga avang pawh hian tlem chuan he game hi a thang vein a rinawm a; kan pahnih hian level sang zawka kan inlan chhunzawm theih phei chuan Mizo player-te’n beiseina sang zawk nei chungin he game hi an rawn luhchilh ngei a rinawm,” tiin thauchhe paihna leh hobby ang leka kum upa zawk leh khawsak kawnga awm thei zawkte’n badminton an khelh deuh berna state-a beiseina eng an neih thu a tarlang tel!
Sanga zinkawng ve thung…
Guwahati tournament lian kal meka Mizo player inlan pha dang C. Lalramsanga hi Durtlang Mualveng rawlthar niin, C. Lungmuanpuia leh K. Lalmalsawmi fate pali zinga pakhat a ni a, singles lama kal zui zel loin doubles (mixed) lamah a insawrbing zui ta a ni.
Yonex Sunrise BWF World Junior Championships 2025-ah hian Taarini Suri nen inkawpin an bultanna inkhelah 15-13, 15-9-in Ireland pair Senan O’Rourke leh Michelle Shochan an hneh.
A pa Lungmuanpuia hi Mizoram Finance & Accounts Service officer niin, tunah hian Finance Department, Government of Mizoram hnuiah Dy. Secretary (APF/PRU/FMC) hna chelh mek a ni a; a hun awl tam zawka badminton khel tlat mi niin, state chhung leh department huangah pawh inelna hmachhawn ve foin, a telna level-ah chuan medal pawh a la ve zauh zauh tawh a ni.
Chuti ang mi chuan a fapate pathum zingah a hnungzuia shuttler tha tak an chhuah ngei a duh a, thutlukna siamin a fapa pahnih chuan infiamna dang thlahin baminton an luhchilh a remti a; Lalramsanga hian ei tling turin kawng dik a zawh chho ta mek a ni.
Sanga hi zingkar leh an hun awl neiha a pa leh a ute nena badminton khelho thin niin, kum 2023 thleng kha chuan singles player a la ni a, doubles player ni tura a insawn dan sawiin:
“Lucknow-a All India Sub-Junior Ranking Tournament-ah khan Under-17 boys’ doubles semi-final kan lut a, kha mi hnu khan National Centre of Excellence lamah doubles player ni turin training ka kalpui chhunzawm ta a ni,” a ti.
BWF World Junior Championships 2025-a a vawi khatna’na India mixed team-in bronze medal an sualchhuahna kawngah pawh Sanga hian a thawhhlawk a, super-sub tia hiala sawi leh hriat a ni!
Quarter-final stage-a South Korea an hmachhawn tum khan Bhargav Ram Arigela leh a kawppui Viswa Tej Gobburu chu opening game-ah 5-9-in an tlawm a; India doubles coach Ivan Sozonov chuan a tactic thlakin, Viswa aiah Sanga a luhtir a, chu chuan awmzia a rawn nei nghal a, India pair thar chuan match hnihah 9-7 leh 9-5 hnehna an chang zawn ta thawt a, India chhantu lian chu Sanga!
Russian badminton coach Sozonov chuan Mizo player fakin, “Sanga hian Korea lakah a tir lam khan mixed doubles a lo khel tawh reng reng a; khelh dan pakhat atanga a chi danga insawn hi a awlsam hauh lo a, mixed doubles atanga boys’ doubles-a insawn thut hi a khirh hle dawn a, chuti chungin medal kan sualchhuahna awngah hian a thawhhlawk takzet a, credit sang tak kan pe lo thei lo a ni,” a tichhuak hial!
Fak hlawh Mizo rawlthar pahnih
Mizoram sports minister Lalnghinglova Hmar pawhin
Zuala leh Sanga chu state chhung badminton tan hmahruaitu (torchbearer) an nih thu sawiin:
“Tunhma kha chuan North-East level-ah takngial pawh medal kan hawn thei lo a, tunah chuan national championships kawngkapui kan chhuih hawng tawh a, international stage thleng kan chuangkai a, tunhma lama kan la suangtuah phak ngai reng reng loh hmunah kan rawlthar pahnih hian min hruaikai ta a ni.
“Anni pahnih theih ang hi an chipuite pawhin an ti thei ngei dawn a, an hnung hi an la rawn zui ve ngei ang,” a ti.
Minister chuan state sawrkarin infiamna lama ke a pen dan sawi chhunzawmin:
“Mizoram sawrkar chuan kumin hian sports lama kan hmasawnna tur ‘Empowering Mizoram Sports programme’ tih chu kan hawng thar a; he programme kaltlanga kan duh leh tum ber chu 2036 Olympics-a India aiawh pha tur Mizo infiammi chherchhuah a ni.
“He Olympic hi thlen tumin India a inbuatsaih mek a, thlen dilna pawh a thlen tawh a; 2036 Olympics-a Mizoramin infiammi kan thawh ve ngei theihna tur hian sawrkar chuan he programme hnuaiah hian sport thlan bik pakua a nei a, chu’ng zingah chuan badminton pawh hi a tel a, hrual bik tur zawnna (talent hunt) pawh naupang kum 8 atanga 15 inkarah kalpui thuai tum a ni,” a ti.