French Open 2nd round lut zingah Osaka

Pathianni zana khelh tan tak French Open women’s singles first round match pakhatah 6-1, 4-6, 7-5-a Italy nula Lucia Bronzetti hnehin Japanesa Naomi Osaka chuan kum thum chhunga a vawikhatna atan French Open second round a lut.
|um li lai Grand Slam champion lo ni ve tawh Osaka hian fa a hrin avangin thla 15 ngawt tennis atangin chawlh a la a, kuminah khelmual a lut leh tan chiah a; January thla khan Australian Open first round paltlang zo lo zawngin a khawsa a, season khata grand slam tournament pahnihna Paris-ah erawh ngai a rawn awh chho tan leh tawh dawn niin a lang a, Roland Garros ang lo takin round hmasaber chu a paltlang ta phawt a ni.
World number one hlui Naomi Osaka hian Philippe Chatrier court-a a tumpui world number 67 Bronzetti lakah awlsam takin set khatna a la mai a, mahse, set hnihnaah harsatna tawkin set a hloh a, harsa taka set thumna lain round two a lut thei hram a ni.
Kum 26-a upa Japanese player chak ni hian Roland Garros-a champion hlui leh tuntuma ninth seed Jelena Ostapenko pawh second round lut zingah telin, first round match-a a hmachhawn Romania player Jaqueline Cristian lakah 6-4, 7-5 hnehna a chang.
Latvian Ostapenko hian kum 2017 daih tawh khan Paris khuaah hian Grand Slam title a lo hlawhchhuak ve tawh a, French Open debut nghakchhuak ve chauh kum 25-a upa Romanian lakah hnehna hmasa changin, a vawihnihna’na title la leh turin a kawng a la thui deuh!