French Open – Djokovic a chak, Fritz a tla

Pathianni khan Grand Slam pali zinga Clay a khelhna awmchhun French Open 2026 khelh Tan a ni a, player langsar Novak Djokovic a chak laiin Taylor Fritz a chak zo lova, a tla nghal.
French Open-a vawi hnih champion tawh Novak Djokovic hian Giovanni Mpetshi Perricard hmachhawin inelna bul a Tan a. World No. 83 Perricard lakah set hloh hmasa bawk mah se set thum a la zawn a, second round a lut.
Grand Slam-ah vawi 24 champion a, vawi 25 champion tlin tuma Tan khawh mek Djokovic hian Perricard lakah bul a Tan Tha lova, a serve pawimawh tak a hum zawh loh vangin set khatnaah a hloh. Set khatnaah hloh bawk mah se set hnihnaah break pawimawh tak a neih a chhawr Tangkai a, game nga hloh chungin set a la.
Set khat ve ve an lak hnuin tawnhriat ngah zawk Djokovic a khel Tha chho ta viau a, game khat chauh hloh chungin set thumna a la. Set linaah Perricard khel chhe lem lo viau mah se a serve a hum zawh loh a tuar a, uiawm takin set a hloh zui leh. Djokovic hian Perricard lakah 5-7 7-5 6-1 6-4 in hnehna a chang a, second round a lut. Second round ah Valentin Royer a hmachhawn zui leh ang.
Player langsar Djokovic a chak laiin World No. 8 Taylor Fritz chu a hnampui Nishesh Basavareddy hneh lovin a tla ve thung a. Fritz hi mipa lamah World No. 10 huanga mi second round lut phak lova tla hmasa ber a ni.
Fritz leh Basavareddy te hi an inhnehtawk viau a, set li an khel chhungin tie-break vawi thum ngawt an khel. Rinkai lo zawk Basavareddy-a’n tie-break hmangin set hnih a la zawn a, tie-break ah vek hnufual zawkah Tangin set thumna a hloh ve zet thung. Set thumna hloh bawk mah se set linaah a khel Tha ta viau thung a, game khat chiah a hloh a, player langsar Taylor Fritz lakah 7-6 (7-5) 7-6 (7-5) 6-7 (9-11) 6-1 in hnehna a chang a, inlehthalna lian a thlentir.
French Open
Grand Slam pali zingah Clay Court a khelh awmchhun French Open hi kum 1891 daih tawh khan inelna neih Tan a ni a, kum 1925 aTang khan Grand Slam-ah telh Tan a ni. Kum 1928 aTang khan tuna an khelhna Stade Roland Garros-ah hian khel Tan a ni. May thla chawhnu lamah khelh Tan niin, June thla tir lama zawh fel Thin a ni. ‘Roland Garros’ tia hriat lar ni bawk French Open-ah hian vawi 14 zet champion tawh Rafael Nadal chu mipa lamah champion ngun ber a ni a, hmeichhe lamah vawi sarih champion tawh Chris Evert chu champion ngun ber a ni ve thung.