French Super Cup chawitu PSG leh bawk!

French Super Cup chawitu PSG leh bawk!
Hun pangngaia Marseille nen goal hnih ve ve thuna an inhnehtawk hnu penalty petah 4-1 hnehna changin Ningani zan Trophee des Champions inkhel lianah Paris St-Germain an chak a, a tum 14-na atan French Super Cup trophy an chawi a, tun kha a zawna vawi li an chakna a ni bawk.
Europe league lian zualte tih dan zulzuiin French football pawhin sum ngah Arab ram pakhat Kuwait lamah huang an zauh a; Jaber Al-Ahmad International Stadium-ah champ nawn awn awn mek PSG an tlawm hman teuh ther ther hle!
Paris St-Germain lam hian first half minute 13-na leka Ousmane Dembele goal khat thun kha an chakpui thei mai dawna a lan thuak hnu second half chawhnu lamah goal hnih an chhuah a, hun pekbelha an si phurh an sut hram hnuah penalty shootout an nghakchhuak a, a vannei zawkah an tang zui leh ta a ni.
Champions League title kawl mektu PSG hi Ligue 1 baka French Cup trophy kawl mektu an nih avangin Ligue 1 champion leh French Cup champion inhmachhawn thinna French Super Cup-ah hian Paris-in season liamta Ligue 1 runners-up Merseille hi an hmachhawn mai a ngai a, an tlawm thelh lehnghal!
He inkhela Merseille goal hmasa zawk hi minute 76-a Mason Greenwood-a penalty chhuihluh niin, hun pangngai tawp hma minute thum chiah awm tawhah PSG player Willian Pacho chuan an lam goal-ah a tilut palh a, Paris hi tlawm mai thei dinhmuna an din hman thuak hnu hun pekbelh minute ngana a kal mek laiin Goncalo Ramos chuan an siphurh a sut a, penalty an thlen theih phah.
PSG goalkeeper Lucas Chevalier chuan shootout-ah hian Matt O’Riley leh Hamed Traore-te goal tur dansakin, Paris lamah Ramos, Vitinha, Nuno Mendes, leh Desire Doue-te’n an chhuihlut vek a, 4-1 hnehna nen trophy an humhim a, tunhnai kum 13 liamta chhunga a tum 12-na atan PSG kutah Super Cup a lut.