Fur ruah a sur that hnuah nipui thlai chin a pung
Fur ruah a sur that hnuah India-a lo neitute chuan nipui thlai chu an thlak pung chak hle a. Fur intan tir lama a nih dan pangngai aia tlem ruah a sur avang khan thlai an ching tha lo hman hle a; mahse, tunah chuan zau takah la, bekang leh buh an ching leh thei tawh.
India hi khawvela buh thawn chhuak tam ber niin khawvel puma thawn chhuah 40% vel hi a thawn a ni a. Hetih lai hian thlai atanga siam tel – palm oil, bekang tel leh nihawi tel ang chi erawh la lut tam ber a ni ve thung.
Indian lo neitute hian nipui thlai hi kum tin fur ruahin chhim lama Kerala a luh tan, June leh July-ah an ching tan ber thin a. Kuminah hian ni thumin fur ruah hi a thleng tlai a, ram ril lamah chawlhkar hnih vel zetin a tawlh lut tlai bawk a, hei vang hian tlai chi thlak hun a tlai phah vek a ni.
June thla tawp thleng khan nipui thlai chin zat chu kum dangah chin thin hmun lia thena hmun khat dawnin a la tlem a, ruah a tlak that hnua chin a pun tak avangin tunah erawh chuan chin thin zat a phak lohna hi 5% vel chauh a ni leh tawh agriculture & farmers’ welfare ministry chuan a tar lang.
Zirtawpni thleng khan lo neituten nipui thlai hi ram hectare maktaduai 78.7-a zauvah an ching tawh a, nikum khan hectare maktaduai 82.6-a zauvah an ching a ni tih ministry-in a chhinchhiahnaah tar lan a ni.
Hectare maktaduai 23.4-a zauvah buh chung tawhin nikum khan hectare maktaduai 240a zauvah an ching a, a phak lohna a tlem hle tawh.
“A chi atana kan tuh hi a sawn hnun atan ruah sur kan nghak thin a. Tun thlaa tha taka a sur hnuah kan phun sawn thei ta a ni,” tiin Konark, Odisha-a lo neitu pakhat, Krishna Beuraa chuan a sawi.
India-a fur ruah sur hi June thla tir lama a nih dan phak lohna 40% dawn ni hman chu thla tawpah chuan 16% vela phak lovah a tlahniam hman a. July thlaah chawlhkar eng emaw zat tha taka a sur leh bawk avangin a sur thin zat a phak lohna hi hniam lehzual tawh beisei a ni.
Lo neitute hian hectare maktaduai 11.4-a zauvah bekang an ching mek a, nikum aiin 3%-in an ching zim deuh zawk.
Hectare maktaduai 7.8-a zauvah vaimim ching tawhin nikum tun ang hun aiin 9.7%-in an ching zim deuh zawk a. La pawh hectare maktaduai 9.87-a zauvah chingin nikum aiin 4%-in an ching zim a, hectare maktaduai 5.76-a zauvah fu chingin nikum aiin 1.5%-in an ching zau zawk thung.