Fury leh Ngannou inhmachhawn dawn

Palian huanga boxer lar, tlawm nei lova kal tluang mek Tyson Fury chuan UFC-a palian champion hlui Francis Ngannou chu Otober 18, 2023 khian Saudi Arabia-ah a hmachhawn dawn.
Boxing-ah chuan Tyson Fury tu nge a nih sawi nawn ngai lo khawpa lar leh hlawhtling a ni a. Tlawm nei lova a kaltluan mek bakah WBC heavyweight champion a ni bawk. Professional huangah inhnek vawi 34 a hmachhawn tawh a, vawi 33 chakin, vawi khat chu Deontay Wilder nen an inhnehtawk. A hneh tawh mi 33 zinga 24 zet knockout in a hneh a. Palian huangah boxer tha bera ngaih a ni mek. Palian huanga kawnghren pathum kawl khawm mektu Oleksandr Usyk nen inhmachhawn tura ngaih an nih laiin inremna an nei thei lova, Fury hian khaw dang a hawi. Usyk a hmachhawn loh vangin Fury hian sawisel pawh a hlawh viau a. Boxer tha tlanchhiat san ang hiala puh chhe tawk pawh an awm. Usyk nen inremna an neih theih loh vangin Fury hian UFC champion hlui Francis Ngannou a hmachhawn dawn.
Boxing a nun bul tan Ngannou hian boxer hlawhtling Tyson Fury hmachhawn a chakna a rei tawh a. Kum thum kal ta daih tawh khan inhnek tur angin sawi tlang than a ni hial tawh. Beisei anga an indawr hlawhtlin mai theih loh hnuin December 18, 2023 a inhnek turin an inremna ta nge nge. Fury a hmachhawn thei tur chu Ngannou chuan phurawm a tih tak zet thu a sawi a. Boxing-a tlawm la nei lo Fury hi hnek tluin, a hneh ngei tur thu a sawi bawk. Ngannou hi khawvela hnek na ber ang hiala ngai a ni a. A hnek khat lek pawhin nikhaw hre lo khawpin Fury hi a siam thei tura ngaih a ni.
Fury hmachhawn tur Ngannou hian UFC-ah fight vawi 20 hmachhawnin, vawi 17 a chak a, mi 12 a knockout. Palian champion a nih laiin a kawnghren a kalsan a, UFC a chawlhsan. UFC a chawlhsan hnuin Professional Fight League (PFL) hmachhawn turin contract a ziak. He contract a ziahna hi MMA huang a mi bik tur ni mah se boxing-ah Fury hmachhawn phalsak a ni. Fury nen hian boxing-ah inhmachhawn phawt a, MMA dan hmanga inbeih zui leh a duh a. Hemi chungchangah hian inremna an nei thei rih lova, boxing dan hmangin an inhma-chhawn dawn. UFC fighter lar Conor McGregor, Tyron Woodley leh Anderson Silva te boxing-ah an lo hlawhchham tawh a. Cameroon fighter hian hnehna a chang thei ang em tih hriat a chakawm.
Fury leh Ngannou te inhmachhawn tur hi exhibition mai a ni dawn lova, professional boxing dan hnuaiah an inhnek ang a, Judge pathum awm in, 10-point must system hman a ni ang. Saudi Arabia-a an inhmachhawn tur hi kawnghren inchuhna erawh a ni lo thung. He inhnekah hian WBC an inrawlh dawn lova, Ngannou hmachhawn turin WBC hian Fury hnenah a bika phalna an pe tho thung.