Gaga & Mars ‘Die With a Smile’ a la Hot ber

Gaga & Mars ‘Die With a Smile’ a la Hot ber
Lady Gaga leh Bruno Mars hla hit ‘Die With a Smile’ chu Billboard Hot 100 (singles) chart-ah a No.1 a, he chart-a a zawna kar li a No.1-na a ni ta. Heti hian hla hrang hrang hmanga he chart-a Bruno Mars No.1 tawh zawng zawng belhkhawm chu kar 38 a tling ta a, Michael Jackson lehpelin, soloist zingah he chart-a No.1 ni rei thei pariatna a ni a, kar 97 No.1 ni thei Mariah Carey chu tuma tluk phak lohin a la sang fal nalh thung.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni.
‘Die With a Smile’ hian radio airplay maktaduai 62.1 leh stream maktaduai 28.1 bakah sales 6,000 a la nei thei a, hei hi chart-ah a kar li nan a No.1 pui leh ta a ni. Gaga tan he hla hi Hot 100-a No.1 kai thei hla paruk a neihna niin, Mars tan a pakuana a ni.
Bad Bunny ‘DtMF’ chu No.2-ah bawk la awmin, a hla dang BAILE INoLVIDABLE’ chu No.3 atangin No.9-ah a tawlh ve thung. Heng hla pahnih te hi a No.1 album ‘DeBI TiRAR MaS FOToS’ a hla ve ve an ni.
Chart No.1 hlui ROSE leh Bruno Mars ‘APT.’ chu No.5 atangin No.3 a kai thar leh ta a, chart No.1 hlui tho Saboozey ‘A Bar Song (Tipsy)’ chu No.4-ah bawk a la awm a, Kendrick Lamar le SZA ‘Luther’ chu No.6 atangin No.5 a kai thar ve leh ta bawk.
Billie Eilish ‘Birds of a Feather’ chu No.7 atangin No.6-ah a insawn thar leh a, Gracie Abrama ‘That’s So True’ chu No.10 atangin No.8 kai thar lehin, chart No.1 hlui Morgan Wallen ‘Love Somebody’ chu No.14 atangin No.10-a rawn kai ve leh ta bawk.