Garo Hills buaina chhui turin Justice (Retd) T Vaiphei ruat

Meghalaya state Garo Hills huamchhunga tunhnaia buaina nasa tak thlen chhan leh buaina a rehna theihna atan rawtna siam turin chief justice hlui T Vaiphei ruat a ni.
Meghalaya larsap thu angin May 4 khan an state sawrkar chuan hriattirna tichhuakin, Garo Hills Autonomous District Council inthlan neih turah kumin March 9-a nomination paper thehluh tumna atanga buaina intan, nunna hial chan leh in leh lo bakah bungrua engemawzat tihchhiatna phahna chu a bul intan dan chhuichhuah ngei tul a ti a, hemi atan hian Inquiry Commission din nise, tiin, Justice (Retd) T Vaiphei hi Commission chairman atan a ruat a ni.
Commission hian buaina intan dan, tute nge inhnamhnawih tih leh, buaina a reh a, nundan phung pangngaia a kal leh theihna tura rawtna a neih Meghalaya sawrkarah thehlut turin a ti a. Thla 6 chhung hun a pe a ni.
T Vaiphei hi Tripura High Court chief justice hlui a ni a, Assam Human Rights Commission chairperson a lo ni tawh bawk.