Gauhati HC-in Aizawl traffic vei

Aizawl khawpui chhung traffic tawt avanga harsatna sutkian a nih theih nan Gauhati High Court Aizawl Division Bench chuan tunhnai khan Mizoram Chief Secretary chu Traffic Management Committee din turin a hriattir a; he committee-ah hian Mizoram Police atangin DGP ngei tel tur leh, committee chu thla hnih danah vawikhat tal thukhawm thin turin a hriattir a. Traffic Management Committee din a nih dan leh hmalak dan tur tlangpui duanna report pawh April ni 18, 2023 aia tlai lovah Court-ah thehlut turin a hriattir nghal bawk a.
Hetianga Court lamin khawpui chhung traffic buaina leh harsatna a rawn vei a, a sutkian dan tur ngaihtuah tura state hnuaia sawrkar hnathawk hotu lu ber hnenah hma la tura a rawn hriattir tawh chuan, ‘a namen tawh lo hle’ tihna a ni ber a. Khawpui traffic tawt dan leh chumiin nunphung a tihkhaihlak nasat tawhzia hi sawrkar thuneitute pawhin an hrechiang a, mahse he harsatna sutkianna tura hmalakna hi awm bawk mah se, a chak lutuk lo. Chutih laiin kawngpui zauh belh leh a thar siam belh theih a nih tawh loh laiin lirthei thar erawh Aizawl district huam chhungah ringawt pawh ni tin 150 vel register thar awm ziah ang a ni tawh a. Hetiang renga kan kal chhoh zel chuan, tlaikhawhnuah ‘lirthei neih theihna Dan’ hi loh theih loha legislate a la ngai leh thovin a rinawm.
Traffic tawt zual zelna chhan hi chu hai rual a ni lo va, lirthei pung zel leh lirthei tlanna kawngpui thar siam belh theih a nih tawh loh vang te, khawpui pawn lam bawh lova khawpui chhung ringawta thil engkim mai seng luh kan tum vek avang te, lirthei nei thar apiangin garage neih theuh tur tih dan kenkawh that a nih loh vang te, khawpui vet chhuaktu ‘Ring Road’ siam kan tum loh vang te, traffic management lamah khawpui sawrkar Municipal leh a kaihhnawih traffic lam coordination fel tawk loh vang te(hei hi parking area thilah) a ni thei vek mai a. Traffic tawt chhan hre lo kan ni lo va, traffic lama harsatna a awm reng chhan hi chu harsatna sutkian nana rules & regulations awmte kenkawh that tawk loh vang a ni pakhat bawk awm e.