India company lian pangate tihtet duh zawk

RBI Deputy Governor Viral Acharya chuan India-a conglomerate lian ber ber te chu competition a awm theih nan leh an pricing power (thil man bithliah) tihhniam nan thiah an ngai tiin a sawi.
New York University professor Acharya chuan Brookings Institute tana paper a ziahah India company lian zual panga a sawi te chu – Reliance (Mukesh Ambani Group), Tata Group, Aditya Birla Group, Adani Group leh Bharti Telecom te an ni a.
Acharya chuan heng company lian te hi trust building hmangin emaw thiah darh leh an market power te chu legal leh regulatory thlak danglam hmanga her danglamin company lian tak nih chu an tana hlawkna awm lova siam ngai a ni a ti a.
Acharya chuan heng conglomerate lian lutuk hian ngaihmawh tur tam tak siamin chung zingah chuan crony capitalism nasa zawkin a hring tiin a sawi bawk a.
Kum 1991-a India rama economic reform kalpui a nih chuan central sorkar atangin state sorkar te chu inla hrang leh thunei zawka siam niin economy hmasawn nan pawh regulation tam tak tihtawpin a awm a ti a. Mahse, tun hnai kum sawm chhungin chungte chu thlak danglama awmin central sorkar chuan a ngai ang bawka hma la lehin sumdawng company lian zawk an pung tial tial tiin Acharya chuan a sawi bawk.
Heng Big-5 conglomerate te hi NIC 2 digit sector 40 chuangah an inhnamhnawih a ti a. An thuneihna leh thiltihtheihna titawp tur chuan Theodore-Roosevelt emaw William-Howard-Taft style a ‘trust-buster’ strategy kalpuia firm lian an nihna leh an monopoly na te tihkeh a ngai tiin Acharya chuan a sawi a.
Chung chu US-ah chuan ram pum huapa product line hrang hranga corporate power a nasat lutuk dawn chuan kalpui fo a nih thu a sawi bawk a. He kalpui dan hian thatna a neih chu sub-group 23 aia tlem lo siamin chu chuan langtlang zawk, balance sheet tha, neitu, management leh governance structure tha zawk a siam a ni tiin a sawi.
Mahse ‘trust busting’ strategy chu tuna sorkar lai mek BJP te chuan ‘national champions’ te duhsaka industrial policy a kalpui mek avangin a taka kalpui a harsa mai thei a ti thung a. Sorkarin a kalpui theih dan sawiin conglomerate lian tak nih chuan productivity gain tlem zawk a thlen tlat zawka siamin kalpui theih a nih thu a sawi thung.
Heng Big-5 te hi India ramah insawhnghetin an lian tial tial tia sawi bawkin Achrya chuan subsidiary ownersip tihlen ni se chuan heng conglomerate te hian intihlen zel hlawk lo zawkah an ngai dawn a ti bawk a. India chu competition friendly zawk leh conglomerate friendly lova siam ngai a ni, a ti bawk a.
Tun dinhmunah chuan BJP sorkarin ‘new India’ a industrial policy a kalpuiah national champions siam a tum tlat tia sawiin chu chuan thil man sang takah siamin a nghawng zel chuan inflation sang a siam zui zel a ni, tiin RBI Deputy Governor Viral Acharya chuan a sawi bawk a.
Heng Big-5 company tena kum 1991-a non-financial sector-a total asset an neih chu 10 per cent atangin kum 2021-ah chuan 18%-ah a kai chho tawh a ti bawk a. Company lian te chu an lian zual thur thur a, a tenau te chu an te tial tial tiin RBI Deputy Governor Viral Acharya chuan a sawi bawk.