GHC Aizawl Bench hmun thar hawng

awl Bench building thar, MINECO ami chu Inrinni khan Chief Justice of India Dr Justice Dhananjaya Y Chandrachud chuan a hawng a. A hawnnaah hian chief minister Zoramthanga, Union Minister of state for Law & Justice Arjun Ram Meghwal leh Gauhati High Court chief justice Justice Sandeep Mehta te an tel.
Chief Justice of India chuan Gauhati High Court Aizawl Bench building thar puitlinna atana theihtawp chhuahtu sawrkar laipui, state sawrkar, district administration, state PWD leh midangte chungah lawmthu a sawi a. Ram inrelbawlna kawngah court-in mawhphurhna pawimawh tak a luah avangin a hmunhma tha, thawktuten felfai taka hna an thawh theihna neih a pawimawh rualin, chu aia pawimawh zawk chu democracy innghahna lungphum pawimawh, dan hmanga rorelna (rule of law) dinpui a ni, tiin a sawi.
“Aizawl Bench building thar pawh hian he ram hi dan hmanga enkawl a nih zia a tifiah a, dan hmanga rorelna hi he ram chelhnghehna pawimawh tak hi a ni,” a ti a. Gauhati High Court-in state pali huamah hna a thawh chu High Court dang aia a danglam bikna a ni tih a sawi bawk.
Chief minister pawhin Mizoram chu India-in separation of juduciary a kalpui khan hmarchhak state-a a taka kalpui hmasatu a nih bakah Lok Ayukta a lo chhuah pawhin hmarchhaka a kalpui hmasatu an nih leh thu a sawi. Tunhmaa underground kaihruai thintuin High Court building hawnnaa thu a sawi ta mai chuan India ropuina leh a chhungah hnam chitinte kan len zia tifiahtu a ni tih a sawi a ni.
He building thar hi NLCPR sum nuai 4624.12 senga sak niin, contractor hi North East Consultancy Services Aizawl a ni, 2017 March 7-ah hna hi thawh tan a ni. A building pui ber hi Zopa chhiarin chhawng li a ni.