Grammy thunawi

Artist panga- Taylor Swift, Batiste, Cyrus, SZA leh Rodrigo te chu ‘Big Three’ category- album, record leh song of the year-ah nominate an ni theuh a, artist dang pathum- boygenius, Eilish leh Lana Del Reuy te chu heng Big Three category zinga pahnihah nominate an ni bawk.
Grammy nomination-ah hian hmeichhe lam an langsar zawk a, award ngaihhlutah pawh nomination-ah a tam zawk an ni deuh zel a, album leh record of the year nomination a lang pariat zinga paruk chu hmeichhia an ni a, best new artist nomination-ah pawh hmeichhia an tam zawk.
Kumin nomination-ah hian history siam an awm nual a, Taylor Swift ‘Anti-Hero’ chu song of the year-ah nominate a ni a, Swift hi Grammy history-ah hlaphuahthiam, a hlaphuah song of the year-a tum sarih nominate ni thei awm chhun a la ni. A hmain Paul McCartney nen paruk ve ve neiin, an innihrual a, mahse, McCartney hia kalsan ta a ni. Swift album ‘Midnights’ pawh album of the year-ah nominate a ni a, Swift hian Barbra Streisand nihrualin, hmeichhe zaithiam zinga album of the year category-a nominate ni ngun ber an ni.
MIley Cyrus hla ‘Flowers’ chu record of the year-ah nominate a ni a, tihian Miley leh a pa Billy Ray Cyrus te chu he category-a pafa a nominate ni thei pathumna an ni a, Frank Sinatra leh a fanu Nancy Sinatra bakah Nat King Cole leh a fanu Natalie Cole te chu he category-ah hian nominate an lo ni tawh bawk.
Billie Eilish ‘What Was I Made For?’ chu record of the year-ah nominate a ni a, Eilish hi kum 22 tlin hmaa Grammy record of the year-a tum li nominate ni thei hmasa ber a ni. Eilish hian 2019 khan he category-ah hian ‘Bad Guy’ avangin award a dawng a, 2020-ah ‘Everything I Wanted’ avangin a lo dawng tawh bawk a, 2021-ah ‘Happier Than Ever’ chu nominate a ni tawh bawk.
December thlaa kum 39 tling tawh mai tur Jelly Roll chu best new artist category-ah nominate a ni a, kum 25 kaltaa Andrea Bocelli (kum 40) he category-a nominate a hnua best new artist-ah ni thei upa ber a ni. Jelly Roll hian hmanni lawka an sem CMA Award-ah new artist of the year a dawng a, CMA Award new artist of the year an dawn kuma Grammy pawh dawng tel nghal hi LeAnn Rimes, Carrie Underwood leh Zac Brown Band an awm tawh a, Jelly Roll hi a palina ni thei tak maw?
Tun kum hnih chhunga CMA Awards pasarih dawng tawh Lainey Wilson chu Grammy best new artist-ah nominate a ni teh tlat a!
Tun tum Grammy hian October ni 1, 2022 atanga September ni 15, 2023 thleng a huam a, nomination atang hian vote hmangin award dawng tur thlan thin a ni a, voting hi December ni 14 atangin January ni 4, 2024 thleng neih a ni ang. Tun tumah hian Grammy-a nominate ni thei tura entry 16,000 dawn a awm niin Academy chuan an tarlang a, Recording Academy-ah hian voting member 11,000 chuang an awm a ni.