Guinea-Bissau president man, sipaiten thuneihna la

Guinea-Bissau President Umaro Sissoco Embaló-a man a ni tih thawm a awm mek laiin sipai officer-ten an ram rorelna chu an kutah an la tih an puang.
An khawpui, Bissau-a silai puak ri a awm hnu lawkah sorkar chuan Embaló-a hren a ni tih a puang.
Sorkar TV-ah sipai officer-te inlan zuiin an ram inthlan tur buaipui mek chu tawpsan a nih thu leh thu leh awm hma chu thuneihna an chang rih dawn tih an puang.
African khawmualpui thlang lam ramah hian Pathiannia president inthlan result puan nghal mek a ni a, eptu lian berin an dintir chu inthlan chuh thei lo tura paih (disqualify) a ni.
Ningania result chhuak turah Embaló-a leh amah nena inbei nasa tak, Fernando Dias-a chuan an chak zawk tih an sawi ve ve tawh.
Nilaini chawhnu tlai lamah khan Embaló-a hian phone-a France 24 biain, “Paih thlak ka ni,” tih a hrilh.
Hemi hma, chawhma lamah Bissau-a silai puak a awm a, inkahnaah hian tute nge inhnamhnawih tih leh thi an awm em tih erawh hriat a ni lo.
Silai a rik hian ke leh lirtheiin mi tam tak an tlanchhe zui niin AFP news agency chuan a tar lang.
A hnuah presidential palace-a sipai inrelbawlnaa hotu ber, General Denis N’Canha-a chuan thuneihna an lak thu hi a puang zui ta a ni.
Officer-te chu ‘High Military Command for Restoration of Order’ pein ramri khar turin a ti a. Mipuite chu chiai lo turin a ngen bawk.
Embaló bakah hian president army staff leh a minister eng emaw zat man an ni bawk nia sawi a ni.
Khawvela ram rethei ber zinga mi, Guinea-Bissau-ah hian kum 1980 atang khan vawi kua lai sipaiin thuneihna an chan leh chan tuma an beihna a thleng tawh.
Embaló-a pawh hian thuneihna a chan chhungin vawi tam a tawng a, a paltlang hram thin.
Guinea-Bissau-ah hian mihring maktaduai hnih pawh tling lo an cheng a, UN chuan Latin America atanga Europe-a ruihhlo tawlh luhna kawng a nih avangin ‘narco-state’ tiin a sawi.