Gynae health chungchanga hriattur

Gynae health chungchanga hriattur
Hmeichhia ten serh hmul ziahfai an ching a, thenkhatin an ziat fai vek a, a thenin a hmul tlem an dah a, a thenin an ziat fai lo a, a nih angin an awm tir mai a. Chutiang style chi thum chu a awm. A eng style ber nge i tih ve thin le? Tun tumah hian Times of India-in hmeichhe tan serh hmul ziah fai a that lohna ni a an sawi te kan rawn tarlang e.
2016-a mithiam ten zirchianna an neiha an hmuh dan chuan serh hmul hi a rawn to dan anga dah mai a tha ber an ti a, serh hmul hi awmna chhan leh tangkaina a nei a ni a, chu chu kan lo tihfai vek chuan serh tan that lohna a awm thei ta a ni.
Zirchianna neitute chuan serh hmul ziahfai vek hian (ziah emaw, wax emaw, trim emaw pawh ni se) mipat hmeichhiatna hman atanga natna inkai chhawn theih chi kai theihna risk a tisang a, chung te chu HPV, chlamydia, herpes leh gonorrhea te an ni.
Hmeichhe lam doctor te chuan serh hmul chu a nih anga awm tir mai a tha an ti zel a, a buaithlakna awm ve thei pakhat chu serh hmul hrik (pubic lice) a awm phah ve thei tih chauh mai hi a ni.
Serh hmul tangkaina pakhat chu kan thawmhnaw hak puan thap deuh emaw, kan exercise lakna kekawr kap hnâwng emaw in serh a nâwk nuam lo tur vengtu a ni a, bawlhhlawhin serh a bawh tur vengtu a ni a, infection thlen thei hrang hrang vengtu a ni bawk.
Serh hmul tam chu i ngai thei a, pubic lice neih i hlau bawk si a nih chuan ziah fai vek lo va trim hi tihdan tha ber chu a ni. Samkhuih leh bakcheh hmanga trim mai tur a ni.
Tih loh tur: Serh hmul chu ziah fai vek loh a tha ber a, hmul ziahna emaw, waxing emaw, lasic hair removal emaw hman loh a tha. Hetiang hmanga serhhmul kan tihfai vek hian serh vunah direct friction a lo awm a, chu chuan harsatna chi hrang hrang a thlen thei. Engpawh ni se, serh hmul i ziat fai duh tho tho a nih chuan i ziahfai dawn apiangin hmanraw thar leh thianghlim chauh hmang la, a hmul chu i ziah fai hmain tuilumin i tinêm hmasa thin dawn nia.