Hamas mi hren la kir lo awm chhun ruang hawpui ta

Hamas mi hren la kir lo awm chhun ruang hawpui ta
Israeli sipaite chuan Gaza-a an mi an hrensak zinga an la lak chhuah loh awm chhun ruang chu an la ta tih an sawi a, US President Donald Trump-a’n muanna a awm theih nana ruahmanna a neih thawh dang kaina tur a inhawng thar.
Master Sgt Ran Gvili-a hi October thlaa Hamas nen inkahhai an puan atang khan zawn a ni tawh.
Israeli Prime Minister Benjamin Netanyahu-a chuan Gvili-a hawpui thei a ni chu ‘hlawhtlinna ropui tak’ a nih thu a sawi.
Israeli sipaite hian Pathianni tuk atang khan Gvili-a phumna hmun hi an zawng a. Hamas sipai pawl chuan an inkara palaite hnenah Gvili-a awmna hmun chungchang leh an hriat ang zawng zawng an hrilh a ni.
Netanyahu-a pisa chuan Israel-in Gvili-a an zawn hmuha an lak kir hunah Gaza tana ramri kânna pawimawh, Egypt nena an inkalpawhna hawn tur a nih thu a sawi bawk.
Netanyahu-a hian Gvili-a ruang hawn a ni chu a lawmawm thu a sawi a, “Kan intiam a, ka intiam angin an zavaiin, mi hren zawng zawng kan hruai haw a ni,” a ti.
Israeli sipaite hian chhuituten an hriat angin kartawpah khan Gaza City bula thlanmual an hai tan a. Sipai thuneitu pakhat chuan thlan hi ‘Yellow Line hrul maiah’ a awm thu a sawi a. He line hi inkahhai hnuaia Israeli sipaite la awmna chin rinna a ni.
Hamas chuan ‘palaite hnenah an hriat tur tul zawng zawng kan hlan a, ruang hmuh theih phah a ni ta’ tih an sawi ve bawk.
An thupuangtu, Hazem Qassem-a chuan Gvili-a ruang hmuh a ni ta hian ‘Hamas chu inkahhai thuthlunga inziakin tih tur a tih ang ti zel turin a inpe’ tih a lantir thu a sawi.
Gvili-a ruang hmuh a nih takah hian Trump-a’n Gaza-a indo a tawp theih nana rawtnain kawng dang a zawh theihna a inhawng taa ngaih a ni a. A hma khan Israel chuan Gvili-a ruang hmuh hma chu tuna an thlen chin bak pen an tum lo a ni.
Inkahhai thawh hnihnaah hian Gaza tun tina sipai awm lohna hmuna siam pawh a tel a, hetah hian Hamas leh Palestinian pawl dangten ralthuam an dahna tur pawh a tel a. Sipai awm tur chu tuna la din chiah loh, International Stabilization Force (ISF) ni tura ruahman niin Israeli sipaite an inhnuk kir vek bawk dawn a ni.
Inkahhai thawh khatna puan a nih khan Hamas-in darkar 72 chhungin an mi hren la dam leh thi tawh pawh an kir vek tura tih a ni a. Israeli dam lai 22 leh thi tawh 27 bakah ram dang mi an la kawlte chu an chhuah nghal a, Gvili-a hi chin hriat lohvin a awm ta ngar ngar a ni.
Gvili-a hi police niin October 7, 2023-a Hamas-in Israel chhim lam beia mi 1,200 chuang an thah leh hren tura mi 251 an hren zingah a tel a. Mi hren tam zawk khi kum hnih chhungin Palestinian mi tang 25o leh mi hren 1,718 nen inthlengnaah telin chhuah an ni.
Israeli sipaite chuan an ram beih chhan let nan Gaza an bei let a, Palestinian 71,660 vel an thi hman niin Hamas hnuaia health ministry-in a sawi.