Harry Kane-a title hmasaber tur la hmin zo lo cheu!

Harry Kane-a title hmasaber tur la hmin zo lo cheu!
RB Leipzig chuan hun pekbelh minute nganaah 3-3-a an mikhual champion fel mai thei tawh tur Bayern Munich an inhnehtawkpuina goal an tilut thei hram a, a career-a eng title mah la sualchhuak ve lo England captain Harry Kane-a ropui hun a insawn hla leh hlek!
Nimina he thu buatsaih lai thleng khan Bayern hi anmahni hnaihbertu leh an German league title 34-na hmin mai tur la dal che chetu Bayer Leverkusen lakah point kua leh goal difference of +30 chuangin an sang tawh a, chhiarkawp danah chuan title la fel turin point khat bak an mamawh tawh lo.
Nizan result tarlan hman lohah an aia game khata khel tlem Leverkusen-in SC Freiburg an hneh zawh loh hlauh chuan Vincent Kompany team-in game dang nghah leh ngai loin champion nihna an chang tawh dawn a, Leverkusen an chak a nih erawh chuan Bayern hian an la nghah leh det a ngai dawn a, May ni 9-a Borussia Monchengladbach an mikhual hunah hian an khelmual hman thiam Allianz Arena chhung ngei maiah title lawm theihna hun remchang an nei thei dawn tihna a ni ang.
Kum 31 mi ni tawh chunga trophy kuah tur la nei ve tlat lo Bayern forward Kane kha match khat hremna avangin Inrinni zan inkhelah a tel ve thei lo a, mipui zing atanga a pawlte inkhelh a lo thlir mai a ngai a; kum 2023 hnu lama Bayern league title hmin leh hmasaber lawm tura a inkau phan phan laiin Red Bull Arena-ah Yussuf Poulsen chuan inkhela ball tawh hnuhnungber hmangin mualneitu Leipzig tlawm tur chhanna goal a khung a, Englishman Kane-a title hmasaber tur a hmin zo leh ta rih lo a ni.
Champion fel law law tura chak mamawh Bayern lamin first half-ah sihnih an chhuah a; home team goal hmasa zawk kha minute 11-naa kum 21 mi lek Benjamin Sesko tihluh niin, chawlhlawk hma minute ruk la awmah Lukas Klostermann chuan Leipzig tan a lu hmanga khung belhin, mikhual lamin half-time thlengin an siphurh pahnih an sut zo lo.
Kompany team beilet hian second half tir lam second 46 lek chhungin Tottenham defender hlui Eric Dier leh ex-Crystal Palace winger Michael Olise-te goal hmangin an siphurh pahnih an sut thawt a; minute 83-ah Germany winger Leroy Sane chuan Bayern hmahruailetna goal thawh ve lehin, Bavarians lam kha chak tlang zui mai tura ngaih an nih hman hial hnuah Poulsen chuan Jonas Urbig chip khumin Bayern title lawm tur a dangbet leh ta rih a ni.