Health care bill pekna’n SEDP sum hman a ni – CM

SEDP tanpuina dawng turte tana sum dahhran atangin health care bill tang mek pekna atan cheng vaibelchhe 40 an hmang tih chief minister Lalduhoma chuan a sawi.
Assembly Session-a member thenkhat thusawi a chhanletnaah finance changtu chief minister chuan, health care bill la thei lo te an khawngaihthlak em em a, a then phei chu an bill chhuak hmu hman loin mual an liam a, mi sum pukin bill chhuah huna pek an tiam a, bill a thleng thei si loa, puk tur pawh hre tawh lo tam tak an awm tih an hria a, an ngaipawimawh hmasa a, cheng vaibelchhe 40 an sanction tih a sawi.
“Hei hi SEDP sum atangin kan pe, kan zep lo. Vote zawn nana hman ngawt ai chuan a tha zawk kan ti,” Lalduhoma hian a ti. Health care-ah scheme tha zawk duan mek a ni tih a sawi a. Budget session-ah a changtu minister-in a la sawifiah turah an ngai tih a sawi.
Thlai thar leina tur pawh D-A-H ‘dah’ an sawi thin a, thil theih loh leh budget la pharh ve ngai lo nih avanga sawi mai maiah an puh thin tih sawiin, “Sawrkar atanga ni thum chhungin D-A-H ‘dah’ hi kan tihlawhtling nghal a, a lo theih meuh mai,” a ti. Cheng vaibelchhe 110 an dah a, sawrkar kum tharah vaibelchhe 150 ah bul tan nan dah leh phawt an tum tih a sawi. Kumina an dah pawh hman a ngaih vak a ring lo tih sawiin, sawrkar rate aia sanga hralhna tur an hriat chuan sawrkar sum dah hi hman a ngai lo thei tih a sawi a ni.