Tunhnai kum sarih chhungin sawrkar laipui chuan Mizoram hnenah ruahtui tla khawlna atana tih bik cheng vaibelchhe 300 chuang a pe tawh.
-- Advertisement --
Parliament Session neih mekah Mizoram Rajya Sabha MP K Vanlalvena zawhna Union Minister of Jal Shakti Bishweswar Tudu chhan danin, Mizoram thingtlang khaw hrang hrangah van ruahtui khawl khawmna atana tuikhuah leh dil siam hna thawhna atan PMKSY Scheme hnuaiah a thawhkhatnaah kum 2015 atanga 2021 chhungin cheng vaibelchhe 282.16 pek a ni tawh tih a sawi a. Rain water harvesting thawhhnihna atan kum 2022 chhungin Mizoram sawrkar hnenah cheng vaibelchhe 28.44 pek a ni tawh tih a sawi bawk.
MP zawhna dang Union Minister of Petroleum & Natural Gas Rameswar Teli chhan danin, Kolasib district Meidumah 2012 January 5-ah ONGC-in natural gas an hmuchhuak a. Amaherawhchu tun thlengin lak chhuah hna thawh a la ni lo. Sihhmuiah oil depot siamna atana ram an en chu a hmun a tha tawk tih Indian Oil Corporation Ltd (IOCL) in a report a. Oil depot siam hna chu Mizoram sawrkarin land acquisition a tihfel hma leh hma loah a innghat a ni.
Parliament Session neih mekah hian zawhna tenau deuhte tiamin, Union minister hrang hrang 20 hnenah Mizoram MP K Vanlalvena hian zawhna 63 a thehlut a ni.