Hun rei tak ata tawh heroin-in kan ram min rawn run a, kan do a, kan do hneh lova, a kum telin a pung telh telh zawk a. Kan police leh excise narcotics ten nikum chhunga heroin an man zat pawh chawhrualin ni tin pava khat deuhthaw a tling tawh a. Kum sawm kalta nena khaikhin chuan a let 60 chuangin heroin hi a hluar tawh.
-- Advertisement --
Kuhva pawh hi heroin ang thova nasa taka mipui harsatna thlentu a ni mek a. Khawchhak atanga a lo luhna hi chu a rei tawh a, Mizoram chhunga inkalpawhna kawngpui chhiat phahna khawpin Kuhva hi a lo lut a. Sawrkar laipuiin, India ram state thenkhat kuhva tharchhuah dehralna tibuai khawpin khawchhak atangin Manipur leh Mizoram kaltlangin kuhva a lo lut thin tih a hriat hnuah kuhva hi lo dang turin state pahnih sawrkarte hi hriattir an ni a. Chuti chung chuan rei tak hmalakna awm mumal lovin a kal chho a.
Kuhva phenah hian ruihhlo leh sawrkar khap thil (illegal goods) dang tawlh ruk thin anga hriatna a lo awm tak hnuah khawchhak kuhva ro lo lut tur hi dan a ni chho tan ta a. A ri chho rum rum a, thenawm state beng a thleng a, Mizoram atanga kuhva ro an state chhunga lut tur an lo dang ve leh a, Mizoram atanga thenawm state-a luhruk tuma kawng zawnna lamah, Hachhek tlangdung leh Bilkhawthlir tlangdunga kuhva chinga eizawngtuten an lo tawrh phah leh ta a ni.
Mizoram chhunga a ruka Kuhva ro phur kualtute pawhin man tawkin lirthei hal te a thleng thin hial a, kuhva zingah Opium Poppy Seed (Heroin siamna thlai chi) man chhuah a nih tak zel avangin kuhva karah dan kalh thil a tel ngei tih finfiahna tha tak a ni ta awm e.
Tuna sawrkarin Mizoram chhunga Khawchhak Kuhva chhekkhawl zat hriat tuma hma a lakna leh thil danga hma lak zui a tum dante pawh hi a tha viau a; mahse, duh ai chuan a che tlai mah mah niin a lang. Kuthnathawktuten khati khawp khan an tawrh phahin harsatna nasa tak a thlen phah tawh a, Task Group on Illegal Arecanut hi a piang tlai mah mah niin a lang. Eng pawh ni se, chak taka hma an lak beiseiin dan loa kuhva tawlhruk an tihtawp ngei beisei ila, mipui pawhin an tha tichak zawnga kan tawiawm thiam a pawimawh awm e.