MNF PARTY ENTAWNTLAKNA

BY David Zochhuanmawia
(Vida Hrahsel Saza)

Mizoram mipuiin MNF sorkar leh a Party hi kan sawisel nasa hle mai a. Fakna lai leh Party dangte tana entawntlak an nihna hi tun tum chu han thai lang ila.
Kumin 2023 inthlan hi an thlir uluk hle a. Hei vang hian Mara Autonomous District Council inthlana tu Party mah an sorkar zawh loh khan BJP nena sorkar intawm an siam chuan Mizoram mipuiin an dem dawn a, chuvang chuan MNF Party-in MDC 9 nei chungin BJP MDC 12 nei kha an thawhpui duh tlat lo a nih kha!
Hun a lo kal deuh a, CM pawhin a remtihna pe a, “Go Ahead” ti meuhva MNF MDC te’n BJP sorkar paihthlakna an remtihpui a, Mara ADC a tlak hnu chuan ngaihtuahna fim zawk vang a ni chêk tur a ni, hemi chungchanga hma an lak tir ber Minister Dr. K. Beichhua chu bantir a ni ta thut mai a. Kumin MLA inthlan thlira MNF Party-in BJP thawhpui chu thil thiang lo hiala ngaiin an Minister leh an MDC 3 chu MNF chuan a hloh ta vek a ni. Party pui anga thlawp lovin mimalin BJP an support a, MADC ah chuan BJP sorkar thar a lo piang ta a ni.

MNF Party MDC 3 te’n BJP an zawm tak vek hi chuan MNF chuan Minister leh MDC 3 lai chânin BJP thawh pui loh chu an hlawh chhuak ta a, mipuiin, “Mara Autonomous District Council-ah BJP in thawhpui tlat mai!” an tih tûr hi an pumpelh thei ta a ni. Party dang tan pawh hemi kawngah kher kher hi chuan an entawn tlak hle mai. NEDA lama an zawm tawh BJP Party-te MADC lama an thawhpui duh lo tlat hi an fakawmna lai tak a ni.

Kan thawhpui te, kan Candidate te hi Mizoram mipui hian an duh tui tial tial a, MNF pawh kawng hrang hranga sawiselna nasa tak karah BJP thawhpui chungchangah chuan Mara Autonomous District Council-ah kher hi chuan an fihlim tlat a ni. Sawi tâk angin MLA General Election-ah hian mipuiin MLA atan mi kan duh tui tial tial dawn a. Mi pamham leh mi hausa neih tlawn chingte, eiruknaa fihlim lo leh unaute/chhungte uchuak taka duhsak thin hi chu kan hnawl zel ngamin a rinawm tawh. Tin, pawisa hmanga Vote inlei tlin tum tan phei chuan hmun a awm lo tan chho zel ang a, kum 2028 MLA General Election-ah phei chuan nasa takin kan fihlimin a rinawm tawh hle a ni.

Chutih lai chuan MNF Party hian Mizoram mipuia lan mawi an duhna kawngah, “CAB hi chu engtikawng mahin kan thlawp dawn lo,” an Lok Sabha MP in a ti dum dum chungin BJP nawrna a na hle ni ngei tur a ni, a thlawp tâk thu kha khawvel mipui hmuh khan MNF MP khan a rawn puang leh tlat bawk a. Hei hi hemi kawnga MNF “Vawrsela pa…” na lai chu a ni. Mipuiin kan hriat reng loh leh kan theihnghilh thuai thuai hi eng Party-te emaw hi chuan an hmanraw lian tak hi a ni reng mai.

Mahse, Mara lama BJP thawhpui an han hreh êm êm dan leh an Minister leh MDC 3 zet hloh hiala mipui mitmei an veng tluantling hi chu an fakawm ve thlawt a ni.