By Huna Kawlvawm
-- Advertisement --
Delhi UT Sorkar chuan kum 2019 2019 October 13 hma ngeiin Delhi khawpui chhunga motor leh lir thei zawng zawngte chuan High Security Registration Plate (HSRP) an vuah vek tur a ni, tiin thu pek khauh tak mai a ti chhuak. Hei hi Supreme Court-in kum 2012 daih tawha thu pek a lo siam tawh bawhzuina a ni. Delhi khawpui chhunga lir thei vak velah hian HSRP hmang lo hi motor nuai 40 aia tlem lo awm anga chhut a ni.
HIGH SECURITY PLATE HI ENG NGE ANIH?
High Security Registration Plate (HSRP) hian Security features bilh tel ngei ngai a awm a, aluminium plate a siam a ni a, hetah hian a pawimawh ber chu hollogram sticker, chip chi khat hi a ni a, he sticker chhungah hian motor detail, a neitu hming, registration Number, enginge No etc te thun tur a ni a, chu chu laser detector camera hmanga chhiar leh finfiah theih tur a nih bakah he Number Plate hi Transport Department a thiam bik ni lo, midangin an thlawn leh lak ve theih loh tura kalh (locked) tlat a ni tur a ni.
He High Security Registration Plate hi a ngaihtuah chhuaktute beisei dan chuan motor accident leh ruk hmang lakah motor hriat chhuah zung zung awlsamna tur a duan a ni.
Hetih mek lai hian he High Security Registration Plate hi India ram state tam bera an hman hian a pawimawh ber ber pahnih:
1. Hologram sticker/chips ah hian engmah an thun lo nia hriat a ni a, a bial ve satliah ringawt a nih chu.
2. Number plate midang lak theih loh tura kalh (locked) tlat tur hi kalh a ni lo nia hriat a nih avangin motor ruk hmang ho chuan thiam takin an la thla thei.
High Security Registration Plate hi kum April 28, 2012 atangin Mizoramin kan hmang tan tawh a, Mizoram chhunga motor zawng zawng deuh thawin an vuah tawh. Amaherawhchu, HSRP vuah a nih chhan ber motor bo chhui chhuahna atan erawh a hman tlak loh tih Mizoram Police ten an sawi a, he thil vuah vanga motor bo hmuh chhuah pakhat mah a la awm lo, (The Zozam Times July 3, 2019 – HC Vanlalruata)
Transport Minister Pu TJ Lalnuntluanga chuan Assembly ah HSRP ah hian “chips” vuah a nih loh thu a sawi.
A security features leh pawimawh ber lai heti mai a nih avang hian Mizorama kan NGO lian ber CYMA chuan Mizoram Transport Minister hnenah High Security Registration Plate hi loh theih loh (mandatory) a ngai lo tur leh titawp turin an ngen hial tawh reng a. Tun hnaia motor ruk an man chhuah zingah he High Security Registration Plate hian rukru lakah a him lohzia te, Motor Engine Number leh Chassis No hial pawh heng Vehicle mafia hovin an khawih danglam thei niin an hmu tlat mai a. Heng an thil hriat thar te hi Mizoram mai ni lo India ram pumpuia fimkhurna dar vuak a nih theihnan Union Transport Ministry lam pawh an hriattir ngei turah ngai ila.
Engpawhnise, he High Security Registration Plate hi Supreme Court thu chhuak a nih miau avangin State pakhatin lo pal zut mai chu a rem kher lo maithei. Amaherawhchu, a pawimawh ber SECURITY FEATURES ber Mizoram a kan Registration Plate a bilh tel loh a nih lai tak hi chu ngaihzam leh en liam mai chi niin a lang lo.