Him taka thalai tirh chhuah dan zawng

Ram pawna hna thawk tura Mizo thalai tirh chhuahna turah an dinhmun a him theih nan department-in hma a la tih LESDE minister Lalnghinglova Hmar chuan a sawi.
Assembly Session-ah LESDE minister chuan, Home department-ah hemi chungchang hi an thlen tawh a, dan hnuaiah engkim kalpui an tum tih a sawi.
Industrial Training Institute (ITI) Aizawl building leh zirna chu a theih ang anga tih changtlun a ni a, tih changtlun zel tum a ni tih a sawi a. Tunah hian NIOS Exam Centre din niin, vocaltional training centre dah a ni a, Tata leh Hyundai nen MoU an ziakfel tawh a, building tih changtlunna tur ruahmanna awm tih a sawi a ni.
“Aizawl ITI hi kum 1964-a din a ni a, tunah zirlai 420 an awm a, hmarchhakah chuan vocational training hmun tha a ni. A zahpuiawm loh a, a upa deuh tawh a, sawrkarin cheng vaibelchhe 20 chuangin building leh hmunhma tih changtlun a tum a, ministry approval nghah mek a ni,” a ti.
House leader, chief minister Lalduhoma chuan, sawrkar laipui suma polytechnic leh ITI building sak chu sawrkar hmasa in a kalpui a, hna zawh loh a tam a, sawrkar hmasa lamah Assembly Public Accounts Committee chairman a nih ve laiin an tlawh chhuak deuh vek a, department hotute an kamkhat a, contractor-te an hau a, an ti nasa viau a. Mah se, sawrkar atanga ‘will power’ a awm loh chuan thil tih a sawt lo a, PAC recommendation a sawt lo, tiin a sawi. Tunah hian engtin nge an tih dawn a, endik leh a, contractor ban mai tur nge tih enzui a ngai tih a sawi a ni.