HIV/AIDS leh Mizoram

Nimin Pathianni, December ni 1 kha World AIDS Day a ni a; 1988 atanga hman tan tawh kha a ni. Mizoramah 1990 atangin AIDS hmuhchhuah tan a ni a. Chuta tanga kum 34 a han vei leh meuh chuan, population atanga chhuta India rama HIV/AIDS kai tam berna state kan ni.
Tun dinhmunah, 1990 Oct atanga March 2024 (kum 34) chhunga Mizorama HIV/AIDS vei hmuhchhuah tawh zat chu 30,523 a ni a. AIDS thihpui zat hi record hnuhnung ber hriat theih chu 5021 a ni bawk. Chawhrualin HIV/AIDS vei ni tin mi 2.5 zel awm ang a ni a, thihpui hi chawhrualin kum 34 chhung khan ni 2.4 danah pakhat awm zel ang a ni. Chawhruala chhut a nih avangin 1990-a AIDS vei pakhat hmuhchhuah kum pawh khan AIDS thihpui awm anga chhut tel vek a ni a. A nihna dik takah chuan, AIDS vei hmuhchhuah a nih hnu kum tam tak chhung kha chu thihpui an awm lo; chu chu chawhrualah chuan chhut tel vek a nih avangin death rate hi a hniam phah a. Thihpui kan awm hnu atanga chhut ni se, hei ai hian AIDS death rate hi a sang zawk fe dawn a ni.
Tun dinhmunah kum tling lo, kum 14 hnuai lam HIV/AIDS kai hi mi 778 an awm niin record a ni a, naupangte hian an nute atanga an kai, an pianpui a ni. HIV kaite hi kum 15-49 inkar an tam ber a, 91.23% an tling a, HIV inkai chhawnna pui ber pawh sex a ni.
HIV/AIDS dona thawm hi a ti ri ring ber state kan ni hialin a rinawm. Red ribbon footbal tournament kan ti, essay inziahsiak, eng eng emaw programme lian tak tak kan huaihawt a, kan ri bung bung a. Banner lianpui pui kan tar a, bag-ah te, vantlang thutthlengah te awareness slogan kan nemkai a, lirthei chi hrang hrang hnung lamah kan tar biai buai bawk a, chutiang atan chuan sum pawh kan seng hnem narawh e. Chutih laiin, mamawh em em CD4 Counter erawh district hming kim pawh kan nei hleithei lo thin a nih kha. Hmalakna thawm kha chu a ring e, tunah HIV/AIDS vei tam ber kan hauhna ri a rawn ring leh a. Khawi laiah emaw hi chuan tih dik loh chu ka nei ngeiin a rinawm; chumi chu zawn chhuah a, inher rem hi kan mamawh ta hle tih a hriat a ni.