Hliam vangin Carlos Alcaraz a inhnukdawk

Barcelona Open khelh mekah champion tura rinkai leh ngaihven hlawh tak Carlos Alcaraz chuan hliam vangin second round a hmachhawn thei lova, a inhnukdawk.
Barcelona Open ah champion tura rinkai ber Carlos Alcaraz hian first round-ah Otto Virtanen a hmachhawn a, set hloh lo, 6-4, 6-2 in hnehna a chang a, second round a lut. Awlsam taka second round lutin, Tomas Machac hmachhawn zui leh tur ni baw mah se banrek hliam vangin a kal zel thei lova, a inhnukdawk ta zawk.
World No. 2 Alcaraz chuan Virtanen nen an inhmachhawn laiin a banrek na vanga ngai a awh phak chiah loh thu a sawi a. An inkhel zawh hnuin uluk zawka en chian a ni a, a chawlh mai loh chuan na zual zawk thei dinhmuna a din vangin a inhnuhdawh tak thu leh in lama tha taka inenkawlin inelna hmachhawn tura a kir leh thuai a beisei thu a sawi tel bawk.
Thiamna ril nei tha tak leh thahrui nghah tak Alcaraz hi hliamin a tibuai zauh zauh a, Barcelona Open-ah bik hian kum thum chhungin vawi hnih ngawt hliam vangin a inlan thei lo. Catalan khawpuiah hian kum 2022 leh 2023-ah khan a champion a. 2025-ah khan final lut mah se Holger Rune hneh lovin a tlawm a, a champion zo lo. 2026-ah champion tum viau mah se hliamin a tibuai a, second round hmachhawn thei lovin a inhnuhdawh mai a ngai zui leh a ni.
Alcaraz hian 2026-ah bul a tan tha viau a, Grand Slam pali zinga a la champion ngai lohna Australian Open-ah a vawi khat nan a champion a. Grand Slam pali zinga champion vek thei zinga naupang ber a ni. Australian Open hnu lamah beisei a pha ta lo thung a. Indian Wells leh Miami Open-ah hma takah a tla a, Monte Carlo Masters ah final lut bawk mah se a elpui lian Jannik Sinner a hneh lo. Sinner lakah a tlawm vangin a trophy kawl mek bakah World No. 1 nihna a hloh tel bawk. Inelna pathumaah beisei a phak loh hnuin Barcelona Open-ah a vanduai zui leh bawk nen a tum a fuh lo zawn hle. May ni 18-h vawi hnih a champion zawn tawhna French Open tan a ni dawn a. French Open-ah fit taka inlan hman turin tan a khawh ang.
Hliam vanga Alcaraz a inhnuhdawh lai hian Britain player langsar ritain’s Cameron Norrie chuan second pal tlangin third round a lut ve thung. Norrie hian second round-a a khingpui Ethan Quinn chu 6-3 4-6 6-4 in a hneh.