Real Madrid ngam loh Bayern

Nilaini zan khan UEFA Champions League quarter-final thawhhnihna khelh zawh a ni ta a, inkhel hmuhnawm tak; goal sarih ngawt luhna inkhelah Bayern Munich in Real Madrid an hneh nawn leh a, semi-final an lut. Bayern Munich hian Semi-final-ah fiahna hautak an hmachhawn zui leh dawn a, champion lai Paris St-Germain an hmachhawn zui leh ang.
Inkhel hmuhnawm German club lian Bayern Munich leh Spanish club lian Real Madrid te hi champions League-ah an intum thei hle a. Inkhel hmuhnawm tak lantir ziah mah se hun pawimawhah Real Madrid an chungnung fo. Semi-final ah ringawt pawh 2000-01 hnu lamah vawi thum ngawt an hneh lo tawh a, quarter-final-ah vawi khat hneh tawh lo bawkin Bayern Munich kawng daltu lian tak chu Real Madrid hi an ni. An ngam loh thin vangin Santiago Bernabeu-ah hnehna chang hmasa mah se Bayern Munich hi semi-final lut tura rinkai zawk an la ni phak chuang lova, an mualah inkhel hautak tak an hmachhawn tura ngaih a ni. Rinlawk ang ngeiin Real Madrid in Bayern an ngam leh viau a, Allianz Arena-ah ngei tum thum ngawt goal thun hmasa zawkah an tang. Beisei lawk anga ngeia inkhel hmuhnawmah tam zawk an nih hnuin Bayern Munich in goal hnih an thun a, an hneh loh fo thin Real Madrid ngei hnehin semi-final an lut ve ta nge nge.
Allianz Arena-a lenglut Real Madrid in duhthusama thain bul an tan. Inkhel tan tirh teah Bayern Munich si nghak Manuel Nuer chuan ball a pe sual nghal. Nuer ball pek sual changtu Anda Guller chuan dik zetin a pet goal a, inkhel tan atanga second 36-na lekah hmahruaina goal a thun nghal der. Guller goal thun vang hian si belhkhawmah 2-2 a ni nghal chiah a, chungnung zawk an awm loh vangin inveng ngawt thei an ni lo ve ve a. Hma taka goal lut hi inkhel a hmuhnawm zui em em chhan a ni.
Hma taka goal an chhuah hnuin Bayern Munich an insiamtha thuai a, hawihai rei lovin goal an thun ve thuai. Ngam taka an khingpuite nawrin player hmuhnawm Luis Diaz chuan Real Madrid defender te chu nalh takin a bum kual te te a, a duh angin siamchhuak thei lo mah se corner a hlawh. Corner atang ball kal hi Aleksandar Pavlovic chuan awlsam takin a tauh goal a, minute 6-naah an si phurh a sut.
Hma takah goal hnih a luh vangin inkhel a hmuhnawm zui viau a, goal thun tumin an innawr tawn na hle. Hlauhawm siama an hun tha neih an hlah ve ve hnuin Real Madrid bawk an che fuh hmasa leh. Real Madrid hian free-kick an hmu. He freekick hi goal hmahruai thuntu Arda Guller chuan top corner-ah pui zetin a pet goal a, minute 29-naah hma an hruai nawn lehna goal a thun. Mikhual an nihna hmunah hma an hruai nawn leh vangin Los Blancos an phur tak zet tawh a, semi-final luh ngei an inring hman hle. Bayern hi an lehthal thin an ni tlat a, zuam pawh an suam tel hle bawk.
An mualah si phur nawn leh bawk mah se ni dang ang mai maiin Bayern an duap duh tawh bik lova, huaisen takin Real Madrid an hmachhawn. An si phurh sut ngei tumin tan an khawh a, defender Upamecano ball pek fing tak dawngtu; awmna hmun tur dika awm Harry Kane chuan goal thunna tur hmun dikah pet hun tur dik takah a pet goal a, minute 38-naah an si phurh a sut. Inhnaihchilh taka goal a inluhchhawk zak zak hi inkhel tihmuhnawm leh zualtu a ni a, entute mit an titlai tak zet a ni.
Si belhkhawmah an hnufual thar leh hnuin Real Madrid an hlauhawm thei hle. Thih leh dam kara leng tak meuh an nih vangin huai takin an khingpuite an nawr a, tlan chak leh ball thiam Kylian Mbappe leh Vinicius Junio te an hlauhawmin Bayern tlarhnung an chhaihb buai nasa thei hle. Player hlauhawm pahnihte hian Bayern tlarhnung an thiat ta nge nge a. Vinicius Junior siamsak tha tak atangin Kylian Mbappe chuan awlsam takin a pet goal a, minute 42-naah hma an hruai nawn lehna goal a thun. Mbappe goal thun hnu hian goal dang a luh belh thei tawh rih lova, Real Madrid in 3-2 a hmahruai chungin chawlhlawk an hmang.
Inkhel tidanglamtu Red card
Chawlhlawk hmain goal nga ngawt lut bawk mah se chawlhlawk hnu lamah game a danglam ta daih thung. Bayern Munich in tactic thar an hmang a, an khingpuite nawr tak siin an tlarhnung an veng uluk leh zual. Hnaitete-ah ball an inpe kual reng a, an khingpuite hmunawl an pe duh lova, an zim tawt zung zung bawk. Bayern Munich hian an khingpuite nawr tawm reng mah se goal erawh an thun thei lawk lo thung.
Inkhel hmuhnawm tak hi red card in a boruak a thlak danglam a, tam zawk Bayern Munich in hun tawp dawn hnaiah goal hnih an thun phah. Real Madrid tan bench atanga lut Eduardo Camavinga chuan yellow a hmuh hnuah tul lo leh atthlak takin a che a, yellow card hmuh nawn lehin minute 86-naah hnawhchhuah a ni. Tam zawk an nih vangin Bayern Munich an phur viau a, na zawkin an khingpuite an nawr zui nghal chat. Box chhungah mawi taka ball an inpek kual hnuin Eduardo Camavinga hmunruak atangin Luis Diaz chuan goal mawi zet mai a thun a, minute 89-naah an si phurh a sut zo.
Bayern Munich in an muala an si phurh an sut zawh hian si belhkhawmah hma an hruai nawn leh chiah tihna a ni a. Tla tur zawk an nih vangin Real Madrid in an theihna zawng zawng sawm khawmin an khingpuite an nawr. Na taka nawrin hlauhawm siam bawk mah se a hmawr an bawk fuh thei lo. Bayern Munich zawkin fuh zetin an nawr let thut a, Real Madrid tlarhnung an thiah hnuin khel tha tak Michael Olise chuan minute 90+4-ah tha zetin goal a thun zui leh a, an mualah 4-3 in hma an hruai let ta chiah a, an chakna a nem nghet. Olise goal thun hnuin goal dang a luh belh thei tawh lova, Bayern Munich chuan an kawng daltu ni fo Real Madrid chu si belhkhawmah 6-4 in an hneh ve ta nge nge a, semi-final an lut ta a ni.
Real Madrid hnawtchhuaktu Bayern Munich hian semi-final-ah Fifa club World Cup- quarter-final-a an hneh loh PSG an hmachhawn zui leh dawn a, a hautak leh khawp ang.