Hmangaihna nge induhna!

Hmangaihna nge induhna!
Hmangaihna leh induhna hi thliarhran har tak mai a ni a, a inkar pawh zim tak niin relationship lama mithiam ten an sawi. Thawnthu leh film-ah te mipain a ngaihzawng tana pangpar thliak tur ringawt pawhin kham bakbahai a lawn ngam thin. Mahse, chutiang chu a tak ram nen chuan inthlau tak a ni.
Hmangaihte tan chuan thih hlauhawmah pawh kan awm ngam, kan ti em ni. Chu chu hmangaihna dik tak tehna ber tur pawh a ni chuang lo e, an la ti ta fo. Hmangaihna tel lo pawhin kan duh te kan neih theih nan trick chi hrang hrang kan hmang thiam tlat.
Psychiatrist Seema Hingoranny chuan, “Induhna hi a nghet lo va, hmangaihna erawhin a daih rei thin. Mahse, chu pawh chu a mihring a zirin a danglam thei. Mi a hmelthat vang ringawt kan hmangaih theih lo va, a hmelthat avanga hmangaih ni a i inhriat chuan, i tisual. Chu chu hmangaihna a ni lo va, duhna a ni,” a ti.
Psychiatrist dang Tarun Khanna chuan, “Tu emaw chu a rilru puthmang tur te i dawn pui tak tak a, amah avanga kalsan ngai te i kalsan ngam a, a tana i tih ngai loh te i tih te, i tih thin te i tih loh phah a, amah avanga i nun a nawm phah veng veng a nih chuan, hmangaihna a ni thei ang,” a ti.
Psychiatrist Harish Shetty erawhin thlir dan dang a nei a, “Engkim hi hmangaihna a ni, hmangaihna leh induhna te hian danglamna a nei lo, hmangaihna daih rei leh rei lo mai a ni e,” a ti ve thung.
Joyeeta Roy chuan, “Hmangaihna chu a puitling zawk a, induhna chu a lo awm thuai/thut a, hmangaihna erawh muangchangin a intuh a, a thang thin. Mi tam takah chuan induhnain bul a tan a, chu chu hmangaihnaah a par chhuak thin,” a ti.