Hmarchhak ADC-ten dinhmun tha zawk luah turin tanrual tum

India hmarchhaka Autonomous District Council hruaitute kalkhawm chuan District Council-in dinhmun sang zawk a lauh theih nan tanho an tum.
Inrinni khan Shillong-ah hmarchhaka Autonomous District Council Conference vawi 1-na neih niin, Council hruaitute an inhmukhawm a. Hma an sawn theihnan kawng hrang hranga thawhho nise an ti. Conference hi Khasi Hills Autonomous District Council chuan a thleng a ni.
Autonomous District Council hruaitu kalkhawm chuan hmasawnna tha an neih theih nan, inunauna tha zawk leh an mipui inpawhtawnna leh inngainatna thuk zawk an neih theih nan thawhho tha an ti a. Hmalakna hmasa atan Cultural Exchange buatsaih nise, tiin, thawhhona lam buaipuitur Committee an din nghal. Lai Autonomous District Council deputy chairman H Lalmuansanga he Committee-ah hian member a ni a; adviser atan Tiprah Motha chief Pradyot Debbarma ruat a ni.
Hmarchhak ADC Conference-ah hian India danpui siamtha a, ADC-ten dinhmun sang zawk an luah theih nana hmalakna kal mek pawh sawi niin, a hlawhtlin ngei theih nan theihtawp chhuaha bawhzui nise, an ti.
He conference-ah hian Lai Autonomous District Council atangin chief executive member C Lalmuanthanga bakah deputy chairman H Lalmuansanga, executive member pahnih – Lalropuia Chinzah leh HC Lalthawmliana te an tel a ni.