Hmarchhak kaltlang ruihhlo tawlhtu hotu man
Manipur Police leh Narcotics Control Bureau (NCB) tang dun chuan hmarchhak state hrang hrang kaltlanga ruihhlo tawlhtu lian, Narcotic Drugs & Psychotropic Substances (NDPS) Act thubuai hrang hranga an man duh tak chu Nilaini khan Manipur-a Churachandpur district an dapnaah an man tih police-in an sawi.
Tuanpi tia hriat, Nengjatuan-a hi Myanmar atanga ram hrang hranga ruihhlo thawn darhtu pawla tel niin India hmarchhak kaltlangin India leh Bangladesh-a thehdarh turin methamphetamine leh heroin an tawlh thin niin NCB chuan a sawi.
Tuanpi-a hi Churachandpur district-a hmun an dapnaah Hotel Venus atangin man a ni.
“Mi man hi ruihhlo tawlhtu lian tak nia hriat a ni a, NCB, DRI leh Manipur Police ten a lakah hian NDPS tlawhchhanin thubuai tam tak an ziak lut tawh a ni,” tiin Manipur Police chuan thu an chhuah.
NCB-in thuchhuah hran an siamah an mi man hi ‘drug kingpin’ tia sawiin Haichin, Chin State, Myanmar-a cheng a ni a, Myanmar atangin ram hrang hranga ruihhlo tawlhnaa tel a ni tih an sawi.
“Thla eng emaw zat chhuia thlithlai a ni a, state hrang hrangin beihpui thlakin chhui a ni a, NCB chuan ruihhlote hi mi tu emaw an kentir nena man zeuh zeuh aiin ram dang danga inzarh pharha tawlh thin hruaitu man tuma thil a kalpui rah a ni,” an ti.
“Chhuina atangin Chin State atang hian hmun hrang hranga ruihhlo tawlh thin a ni tih hriat a ni a. Manipur, Mizoram, Assam leh Tripura kaltlanga India hmun hrang hrang leh Bangladesh-a methamphetamine leh heroin tawlhna kawng a thunun vek a ni,” an ti.
Tuanpi-a hi NCB leh ruihhlo dotu agency hrang hrangten a laka NDPS thubuai an ziah sa a ni a. Methamphetamine kg 28.22 leh heroin kg 1.278, a vaia Rs. Vaibelchhe 25 chuang manah pawh a lakah thubuai pathum ziah luh a ni tih officer-te chuan an sawi.
Churachandpur Police, Singngat Police leh Directorate of Revenue Intelligence (DRI) pawhin a lakah hian thubuai hran pasarih an ziak lut bawk tih an sawi.
Chhuinaah chuan ram hrang hrangah inzar pharhin ramri kânin ruihhlo an tawlh a, a phurhna, tual chhunga buaipuitu, a lo dawngtu leh sum leh pai khawihtu pawh mumal taka nei an ni a. An pawl khawih methamphetamine, heroin leh dan bawhchhiatna dang thil man tawh hlut zawng chu Rs. vaibelchhe 53 chuang nia ngaih a ni.