Hmarchhak state zingah khualzin hip luh lamah hma kan sawn ber – Chief minister
Hmarchhak state zingah khualzin
hip luh lamah hma kan sawn ber
– Chief minister
Nikum chhung khan hmarchhak state ho zingah khualzin hipluh kawngah Mizoram-in hma a sawn nasa ber tih chief minister Lalduhoma chuan a sawi.
Hnahsin Kut 2025 chu Thawhlehni khan Champhai Zotlang Mualah neih tan a ni a, a hawngtu chief minister chuan khualzin hipluh theihna remchang ngah mah ila, hmang chhuak thiam loin kan awm reng a. Thangthar fingvar zawk an lo chhuak a. Tourism department pawhin tourism sector a kalpui thiam zel a. Inkalpawhna kawng a lo tha zel bawk nen, khualzin kan hip tam tial tial tih a sawi.
“Nikum chhung khan Mizoram hi hmarchhaka khualzin hipluh lama hmasawn nasa ber kan ni a, chhinchhiah chinah khualzin 520000 chuangin an rawn tlawh a, a kum hmasa aia a punna chu 139.50% a ni. Kuminah relin Sairang a rawn thleng a, khualzin an pung hle turah kan ngai,” a ti.
Khualzin tana tlawh nuam taka insiam thiam chu tourism sector-a a pawimawh lai ber a ni, tiin, kan ram mawi tak an rawn hmuh rualin Zonun zemawi, tlawmngaihna, rinawmna, aia upa zahna, mikhualte chunga that chhuah thin hnam kan nihna rawn hmu tel se, kan hnam kan chawimawi tihna a ni nghal zel tih Lalduhoma hian a sawi.
Champhai district chu zin khawthawnna atana hmun tha tih sawiin, “A ram a nuamin a mawi a, pipu sulhnu tam tak a awm. Kan zawrh thiam phawt chuan local tourist ringawt pawh tam tham tak hipluh theih a ni. Keimahni leh keimahni kan intlawh tawn a, khawi hmunah emaw sum leh pai kan han hmang chhuak hi tourism hmanga economy kan inchawikan tawnna a ni zel. Chutianga mipui hip thiam apiang chuan an chhawr tangkai dawn,” a ti.
Hnahsin Kut ngaihtuah chhuak thiam an nei chu vanneihthlak a tih thu chief minister hian a sawi a. Tihlawhtling tura Champhai mipui tanrualna leh inpekna chhuanawm a tih thu sawiin, sawrkar pawhin a phurpui a, theihtawpin an thawhpui tih a sawi a ni.
Kumin hi Hnahsin Kut neih tum hnihna a ni a. Champhai Nature Conservancy, YMA Zotlang Branch, Champhai District Photographers Society, Champhai North Joint VC, Champhai South Joint VC, Zotlang, New Champhai leh Tlangsam VC tanghoin Champhai mipui behchhana an buatsaih a ni.
Nikum Kut kha mi sing ruk chuangin an chhim nia hriat a ni a. Kut denchhena Champhai leh a chhehvel mipui sum lakluh tlingkhawm chu cheng nuai 1000 chuang nia ngaih a ni.