Hmasawn zawnga kal Tuichangral
Inrinni zan Ather Pro Volleyball League mipa inkhelah set an hloh hmasa zet chungin Tuichangral chuan set thum set khatin Durtlang North an hneh a, pahnihnaah an inhlangkai.
LPS Arena, Falkland-ah Lalbiakmuana leh set hnihna atanga khel Sonu chuan kawng dikah Tuichangral hruaiin 20-25, 25-23, 25-19, 25- 22-in an chak a, vawithum an khelh tawhah tum hnih chakin point an la hmu ziah a ni.
Harsa loa Chhinga Veng Spikers an hneh hnuah Tuichangralin Thutak Nunpuitu Team an hneh zo lo a, mahse, set hnih an lak avangin point khat an hmu a; insiamtharleh an mamawh lai takin Durtlang North hmaah Mizo hlangin set hmasa ber an hloh.
Tihsual nei mang loa point thum hlohin Biakmuana’n vawi 20 a hlap tla a, Sonu chuan tum 15 vaw tlain tum li a tisual bawk. Set hnihna atangin fei takin an khel tluan a, chutih rualin player dangte’n point an hloh hnem a, inkhel an thunun thei bik lo.
Durtlang North-in a tir lamah an khel tha a, Johan Vanneihsanga’n point riat paih mah se vawi 25 vaw tlain a vawi khatna’n Kuriz Player of the Match-a thlan a ni a, mahse, a kawppui Shashank Kandpal chuan point 18 a hmuh laiin 15 a hloh a, hnehna an sualchhuak zo lo.
Set khatnaah 13-13 atangin rin hlawh lo zawk Durtlang North-in an kalsan a, Johan-a’n team fuihphurin a hnung atangin tha zetin a vaw tla a; H. Malsawmsanga’n a hlap tlak ve leh hnuah 23-19-in an sang. Lehlamin 20 an hmu ve tihin Thangminlal Guite chuan rang takin chiang zetin a hlap tla a ni.
Set an hloh hnuah Tuichangral coach David Aizawmpuia Fanai chuan team siksawiin Sonu a dahlut a, a hma aia nghet leh hriam zawkin an khel thei. |um danga rinrawla an hman Zomuansanga erawh set hnih khel tluan loin a awl zui ve thung.
Vawihnih Pro Volleyball Mizo best player ni tawh Biakmuana a rin tlak a, felfai leh fing takin a khel a, a ball hmuh point-ah chantir zelin 20-16-in hma a hruaipui.
Lehlamin nawrletin 22-21-in an hnaih hman a, hetih lai hian captain H. Lalruatsanga’n service sualin Durtlang North tan a pawi.
A vuak nat chhawrin Shashank chuan tum hnih a vuak tlak laiin vawikhat a tisual a, 24-23-in Durtlang North-in an hnaih leh hman.
Biakmuana’n boruak rit vai kiangin a hlap tla a, Tuichangral tlangpuiin inrintawk leh zualin set thumnaah an inlan a, Sonu chuan vaw tla zawnin 20-14-in an sang a, derthawng tawh loin set an la zawn.
Set linaah Durtlang North-in kir leh tumin Johan-a an chhawr rim a, Tuichangral tan Biakmuana leh Sonu chuan khelh that chhunzawmin hmahruaitu an nih zel laiin Hmunmawia’n a vuak sual hnuah 20-20-in an intluk.
A hnuah 21-21 a nih laiin Biakmuana’n a vaw tla a, Johan-a’n chhanglet thei loin a hlap sual ve thung a, Durtlang North-in ho taka an tihsual zui leh avangin 24-21-in Tuichangral an sang. Khawbel tlangval Johan-a’n vaw tla ve leh mah se Sonu chuan chakna point a thawkchhuak a ni.
Hmahruaitu Hunthar aiin point hnihin Tuichangral hniam mah se point ruk kawl mekin khelh hnih an la neihah semi-final lut thei dinhmun tha an luah a; May ni 14 zanah Hlimen nen inkhelin, May ni 18 zanah Hunthar nen an intawng ang.
Tuichangralin player duhthlan tur an neih laiin team nghet neih an harsat a, Saidingpuia Sailo chuan point 11 a hmuh laiin point riat a hloh a; Hmunmawia’n vawi kua vaw tla chungin point ruk a hloh bakah Vanlaltanpuia’n point nga a hmuh zat chiah a paih bawk.
Durtlang North tan Thanga’n tum 14 hlap tla chungin point nga a hloh a; Sawmsanga’n point 11 hmuin point sarih paih ve thungin, Vanlalthuama’n vawikua vaw tlain tum thum a tisual.
Khelh hnih an la neihah semi-final lut turin team pum puiin hmasawn an mamawh a, Hlimen an hneh hnuah TNT leh Tuichangral lakah an tlawm zawn. May ni 16 zanah tun dinhmuna hmasawn Chhinga Veng leh May ni 21 zanah Hunthar an khelhpui dawn a ni.
Luangmual kal tluang lai dangtu Serkawn
Chhim team tha Serkawnin hmahruaitu Luangmual chak tluang lai titawpin karliamta Zirtawpni zan Ather Pro Volleyball League hmeichhe inkhelah set thum set hniha chakin semi-final an lut.
LPS Arena, Falkland-ah Elisian Medai leh R Laltleipuii’n rin hlawh lo zawk Serkawn chawi kangin el tham hmel thar an puttir a, 15-10, 15-13, 11-15, 16-14, 12-15-in an chak.
2022 best spiker Elisian chuan vawi 23 vaw tlain point riat hloh mah se Kuriz Player of the Match-a thlan a ni a; Tleipuii’n point 15 hmuin tum nga a tisual ve thung a; Luangmual tana thawhhlawk ber Lalramliani’n point 14 hlawhchhuakin point ruk a paih.
Kai thar Serkawnin league kal meka tum thum an khelh tawhah a vawihnihna’n hnehna an chang a, May ni 15 zanah Bungkawn nen inkhelin league an khar ang.
Hetih lai hian knockout round lut pha loin table-a hniam ber Durtlang an tla ve nghal a ni.
Luangmualin hriat reng tlak loh sulhnu an hnutchhiah ve thung a, Pro Volleyball-a an tel tirh 2023 atangin khelh 10 an chak zawn hnuah a vawikhatna’n an tlawm. League khel zoin tum thum an chak a, set 14 lain point 14 an hmu a, um phak theih lohin an sang ber tho a ni.
Mizoram volleyball inelnaa an inlan hmasak berah Serkawnin boruak an ngam tawk lo a, Diakkawn lakah set la loin an tlawm pawh.
An khelh vawihnihnaah set nga la fai vekin Durtlang an hneh ve thung a, insawhnghet zui zelin title thlir ngamin Luangmual hmaah an inlan.
Semi-final pakhat zawkah Luangmualin league-a palina an hmachhawn ang.
Hmasawn zawnga kal Tuichangral
Get real time updates directly on you device, subscribe now.
Next Post