Manchester City in champion an hnaih

Inrinni zan khan English Premier League (EPL) 2023-24 khelh chhunzawm a ni a, Fulham mualah 4-0 a chak Manchester City in champion an hnaih. City hian hmahruaitu Arsenal chu point hnihin an lehpel lailawk a, Pathianni zanah Arsenal an chak a nih chuan City hi pahnihnaah an tlahniam zui leh thung ang.
Fulham hmachhawn tura Craven Cottage-a lenglut Manchester City hian chak ngei tumin thapui an thawh a, an lenluhna mualah an khel tha viau a, goal pawh an thun hma hle. Inkhel tan atanga minute 13-na lekah defender Josko Gvardiol chuan forward pangngai ang maia thain a khalh tlang a, chaiai hauh lovin lei hrulah a pet goal zui a, hmahruaina goal a thun. Team lian zawkin hma taka goal an thun hian inkhel hmel a tidanglam a, Fulham an bet tluan.
Hma takah goal thunin, khel tha zui viau mah se City in goal an thun belh thei lawk lo va, si khat faia hmahruai chungin chawlhlawk an hmang.
Chawlhlawk hmain goal thun belh thei lo mah se, City hian chawlhlawk hnu lamah goal an thun belh leh thuai a, goal thum ngawt an thun belh ta hial bawk. City tan hian FWA Footballer of the year chawimawina dawng hlimhlawl Phil Foden chuan leihrulah chiang zetin a pet goal a, minute 59-naah an goal hnihna a thun. Si hniha hma an hruai vangin City an inringtawk leh zual a, thlamuang takin Craven Cottage-ah an inlan chhunzawm.
An mualah ngei si hnih phur tawh mah se Fulham in an mikhual an nawr let thei lova, City an chhaih buai phak lo a ni ber mai. Arsenal lehpel tura chak ngei ngei mamawh City tan hian goal hmahruai thuntu Josko Gvardiol chuan minute 71-naah an goal thumna a thun a, an hmahruaina a tizau.
Si thum fai ngawta hma an hruai tawh vangin City manager Pep Guardiola chuan top-scorer ni mek Erling Haaland a la chhuak a, Julian Alvarez a luhtir. Goal thun lova lakchhuah a nih vangin Haaland a lawm lo viau a, a chhuah dawnin manager Pep Guardiola a chhuahchhal deuh sak. Manager nen an inchhanna hi team tana thahnem ngaih luat vang a nih thu Haaland hian a sawi zui thung a. Manager nen boruak chhia an neih loh thu a sawi a, titi awm hluai thei tur a vaw dai.
Haaland chhuah hnu hian hun pangngaiah goal dang a luh belh thei lo. Hun pek belh tawp dawn hnaih lamah Fulham an chesual nawn leh a, Issa Diop hnawhchhuah a nih bakah penalty an chawi. He penalty hi bench atanga lut Julian Alvarez huan minute 90+7-ah a pet goal a, an goal lina thunin a tawp a khar.
Fulham laka point thum an hmuh hmangin City hian Arsenal an lehpel a, champion an hnaih leh zual. City hian khelh hmabak pahnih an la nei a, an khingpui leh tur Tottenham leh West Ham te an hneh ve ve a nih chuan an champion ngei dawn. Arsenal hmakhalh a, an champion leh a nih chuan EPL-ah a zawna vawi li champion zawn thei hmasa ber an ni ang a, EPL record thar an siam ang. City hian an khelh hmabaka an khingpui hautak ber tur Tottenham chu nilai zan khian an hmachhawn dawn a. Tottenham mualah an chak a nih chuan champion tluk an ni hial tah ang. City elpui lian ber Arsenal chuan Pathianni zan khan team lian Manchester United an hmachhawn a. United lakah Arsenal an tlawm emaw, an chak zo lo emaw a nih chuan City hian champion an hnaih leh zual sauh dawn bawk.
Pa 8-naah Chelsea an insawh nghet
Team lian, team hausa, beisei anga result tha nei hleithei lo Chelsea chu season tawp lamah an insiamtha a, chak an thiam thar. Nottingham Forrest lakah 3-2 a chak Chelsea hi pariatnaah an insawh nghet a, Europa Conference league khel thei dinhmunah an ding mek.
City Ground a lenglut Chelsea hian bul an tan tha a, goal pawh an thun thuai. Inkhel tan atanga minute riatna lekah Mykhailo Mudryk chuan Blues hmahruaina goal a thun. Hma takah goal chhuah mah se him hram tuma tan khawh Forrest an buai rei lova an si phurh an sut thuai. Forrest tan hian Willy Boly chuan minute 16-naah goal thunin an si phurh a sut a. Hun rei tak goal a luh belh theih loh hnuin Callum Hudson-Odoi chuan minute 74-naah hma an hruai letna goal a thun.
Hun tawp dawn hnaihah hnufual zawk an nih vangin Chelsea in goal thun tumin tan an khawh thar a, inhnaih chilh taka goal thun zawnin hnehna an chang let. Chelsea tan hian Raheem Sterling chuan minute 80-naah goal thunin an si phurh a sut a. Sterling goal thun atanga minute hnih hnu lekah Nicolas Jackson chuan an chakna goal a thun zui leh.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More