Hmasawnna atan kan rama awmsa hmang tangkai ila – CM

izoram hmasawnna atan kan rama kan neih sa, a awmsa hmang tangkaiin kan haichhuah a, remhriatna, taimakna leh tumruhna nen ram hmasawnna hna chu tihlawhtlin theih a ni tih chief minister Zoramthanga chuan a sawi.Mission Foundation Movement (MFM) hmalaknaa Reiek RD Block chhunga Start-up Entrepreneurship Development Programme (SEDP) model project kalpui dan leh hlawhtlinna hmuh documentary siam chu Zirtawpni khan chief minister hian a tlangzarh a. Mahni kutkawiha eizawnna kawnga hmasawnna thlen tura thahnemngai taka hma lak a pawimawh, tiin, kuthnathawh chu eizawnna hlawhtling a ni thei tih chiang mah ila, ram pum hmasawnna atan chuan hman atanga tih phunga neih tawhte kalsan a tul thin tih a sawi.
Sawrkarin engkim a vaihma vek tur niloin, a theih chin chinah privatization kalpui a that thu leh sawrkar chuan remchanna siam a, mimal emaw private firm-in amaha a tih theih loh hna liantham chu a thawh tur a ni tih a sawi.
SEDP hi Ministry of Tribal Affairs-in kum 2019 – 2020 chhunga Special Central Assistance to Tribal Sub-Scheme hnuaiah Social Welfare department kaltlangin cheng nuai 335 a sanction a. Reiek RD Block, Mamit district (Aspirational District) huamchhunga chhungkaw 300 (entrepreneur nilai 120 leh entrepreneur thar 180) ten tanpuina hi an dawng.
Implementing agency hi MFM niin, Ministry of Rural Development National Rural Livelihood Mission hnuaiah Start up Village Entrepreneurship Development (SEVP) programme kalpui tura rampum huapa empanelled list-a thlan a ni a, Kolasib district-ah SVEP project hi a kalpui mek. Mamit (aspirational district) a kalpui tur hian DPR buatsaihin sawrkar laipui hian a rawn pawmpui ta a ni.
Tanpuina hi a sumfai niloin, an trade thlan mil hnathawhna bungrua pek an ni a; entrepreneur nilai ten Rs 45000 hu bungrua an dawng a, entrepreneur tharte Rs 65000 hu bungrua pek an ni thung. Group titha Lushai Organic Reiek hnenah Rs 100000 pek an ni.