Hmeichhe chunga chetna MHIP-in centre-ah thlen

Hmeichhe chunga chetna
MHIP-in centre-ah thlen
Manipura Zohnahthlak hmeichhe chunga pawngsual leh hleilenna thleng chu Mizo Hmeichhe Insuihkhawm Pawl chuan India sawrkar hnuaia hmeichhe lam ngaihtuahtu bik pathum hnenah a thlen.
MHIP Gen. Hqrs. thuchhuak chuan, hmeichhe pawisawi lo diriam a, pawngsualtute zawnchhuah kawnga rang taka hma la tur leh dan anga a na thei ang bera hrem an nih theihna’n Union minister for Women and Child Development, National Women Commission leh National Human Rights Commission hnenah ngenna lehkha a thawn tih a sawi.
Manipur tualchhung buaina chhuaka Zohnahthlakte tawrhna leh an hmeichhiatpuite chunga hleilenna rapthlak tak thleng chu pawi a tiin thleng tawh lo se a ti takzet tih MHIP hian sawiin, ‘Hetiang thil rapthlak hi thleng theiah pawh kan ngaih loh a ni a, Mizoram pawn ami pawh nise, kan Zohnahthlak pui, kan unau, kan hmeichhiat puite tawrhna chu kan tawrhna a ni a, MHIP chuan na a tiin a rum tlawk tlawk a, Zohnahthlak hmeichhiate thlavang hauh turin ke a pen zel dawn a ni,’ a ti.