Ran vulh lama ei zawn naah intihsiakna siam

Ran vulh lama ei zawn
naah intihsiakna siam
Animal Husbandry & Veterinary Department leh Mizoram Entrepreneurs’ Forum tangdun buatsaih ‘Vetpreneur Business Plan Competition 2023’ neih chu Ningani khan khar a ni a, lawmman sem nghal a ni.
He hun hmanpuitu AH & Vety minister Er Lalrinawma chuan entrepreneurship hawi zawngin an department programme hrang hrang an her chhoh hret hret tih sawiin, thalaite chu hnam venhimna leh hmasawnna atan kan vela hnathawh tur awm apiang thawk thiam tur leh thawh tum turin a sawm.
Vetpreneur Business Plan Competition chu kan ram economy chawikanna kawngah awmzia thui tak a neih ngei a beisei tih sawiin, ram dang atanga thlai chi hrang hrang kan chawkluh thinte man tlawm taka lei theih a nih avangin kuthnathawktuten an thlai tharte man tlawm lehzuala an hralh theihna’n a tir atanga an senso tur mumal taka chhut thiam hmasa thin turin Er Lalrinawma hian a chah a. Ranvulh leh a kaihhnawih lama inhmnamhnawihte dawmkana chawikan chu an tum ber a nih thu leh ran damlo enkawl, rang taka hri danna pek, hrileng tur ven, mihring leh ran atanga natna inkaichhawn theih tihrem te chu an ngaipawimawh tih a sawi a ni.
Vetpreneur Business Plan Competition 2023 pakhatna dawngtu chu Dr Freddy H Siamthara – Vetmiss, Upper Kanaan Aizawl niin cheng nuai 3 a dawng a; pahnihna hi Winkle Laltlanchhunga, “Trinity Organic Farm”, Upper Kanaan Aizawl niin nuai 2 a dawng a; pathumna hi Dr Angela L Renthlei, “GR Foods”, Pema Colony Chaltlang niin nuai 1 a dawng.
He competition-ah hian district hrang hrang atangin mi 49-in topic pali – meat processing, milk processing, livestock value chain leh veterinary service delivery hmangin business plan an thehlut a, screening leh interview kaltlangin lawmman dawngtute thlanchhuah an ni. Mi panga-in consolation prize cheng singkhat theuh an dawn bakah vetpreneurship lama mi hlawhtling mi pali chu chawimawina thuziak leh thilpek hlan an ni.