Hmeichhe chunga hleilen tih tawp theihna tur inhrilh thar

Hmeichhe chunga hleilen tih
tawp theihna tur inhrilh thar
Hmeichhiate chunga hlei len leh enhran an nih thin tihtawp a nih theihnan School Education department hnuaia mawhphurtu hrang hrangte chu an hriat tur tul hrilhin School Education department leh Women & Child Development department chuan Thawhtanni atanga tanin December 10 theng awh tur inhrilhhriatna hun an buatsaih.
Thawhlehnia he programme khuhhawngtu School Education minister Dr Vanlalthlana chuan hmeichhe chunga hleilenna chu tih tawp a ngai a, tih tawp a nih theihnan district tinah hma lak a ngai, tiin, “Mipa leh hmeichhe inthliarna leh inenhranna, mihring zalenna chhuhsak, dan laka enhranna a huam vek a, naupangte chhanchhuak tur hian kan chetchhuah a ngai a ni,” a ti.
School Education director Angela Zothanpuii chuan mi thenkhatin hmeichhiate chu chawikan an ngai tawh lo, ti thin mah se, POCSO case ho enin hmeichhiate hi chhanhim a, venhim an la ngai reng tih a lantir tih a sawi.
Women & Child Development director Zoramthangi Chhangte chuan hmeichhe humhalhna dan chi hrang hrang – in chhunga hmeichhiate venhim, hnathawhna hmuna mipat hmeichhiatna hman luihpui leh kum tling loa innei tur venna dan siam a ni tih a sawi. “Hmeichhiate chunga hleilenna a nasa a, chhungkuaah hmeichhe chunga kutthlak a la tam a, kan ramah hmeichhiate himnan hma lak a la ngai nasa a ni,” a ti. District hrang hranga protection officer-te hian hmeichhiate chunga hleilenna hi an dawng nasa hle tih a sawi bawk.
Women & Child Development deputy director Laltanpuii chuan hmeichhe venhim leh zirtir hna thawh dan leh an thawhpuite nena thawh ho dan tur a sawi a. Deputy state project director Zionparlawma’n hmeichhe naupang enrollment leh drop-out rate a sawifiah.
Mizoram State Sports Council-a sports promotion officer H Laldinsanga’n hmeichhiate sports lama hma an sawn theihna tura school-a sports activity pawimawh dan a sawi a. Science Teacher Association Mizoram secretary Zothanliana chuan education leh hmeichhiate tih chungchang a sawi bawk.
He programme-ah hian district education office leh sub- divisional education officer-te, circle education officer-te leh Aizawl district-a primary atanga higher secondary principal leh headmaster-te, district programme officer-te leh child development project officer-te an tel a ni.