Hmeichhe tan- Mipa ngaihzawn loh chi

Hmeichhe tan- Mipa ngaihzawn loh chi
Ngaihzawng nghet tur i zawng emaw, tu emaw han date ve zuai tur i zawng emaw pawh a ni thei. Tu emaw nen intawngin, in hlim dun viau a, mahse, in daih rei dawn lo tih te a hrechhuak leh lawi si. Hmangaihna avanga natna i tawrh tur tam tak i pumpelh theih nan, hmeichhe tan, engti kawng maha ngaihzawn loh tur mipa an awm niin relationship lama mithiam ten an sawi tlat mai.
1. Mipa ngaihzawng then hlim, rilru mumal la nei lo chu ngaizawng duh suh. Hetiang hunah hian an rilru a no a, an hmuh theih ang ang vawn chawt mai an awlsam. Mahse, chu chu i lakah a luangliam tihna a ni lo.
2. Mipa uikawm lutuk te chu a hnaiha hnaih lek loh tur. Nupaah insiam ta pawh ni ula buaina inngah ngawt ang. Hmeichhia ten mipa hausa tak an zawng vek kher lo, mahse, mipa uikawm, hmeichhe tana insengso hreh tlat te chuan hmeichhe hlimna an thlen tak tak thei lo. Uikawm tihpiah lama hmeichhe neih ei tum zawk tlat mipa phei chu a rang thei ang bera tlansan vang vang tur.
3. “I zei viau a, mahse, ani kha a zei zawk,” ti a a ngaihzawng hlui nena tehkhin thin che mipa bulah chuan i awm reng peih dawn em ni. A ngaihzawng hlui chu a rilru atangin a la thi thei tak tak lo tihna a ni. I then nghal hmak a nih loh chuan chutianga intehkhin i duh loh thu chu hrilh la, chutiang hnuah pawh a la sim loh a, i la kawp zui zel a nih chuan nangmah kha i mak zawk khawp mai!
4. A ngaihzawng hlui nen khan thiantha takah an inchhuah a, an la inkawm zui zel em ni? Mipa te hian an hmeichhe hmangaih tawh lakah chuan rilru no an la pu deuh reng a, chu chu chhem alh leh a har miah lo. Chuvangin, a ngaihzawng hlui thian anga kawm zui talh a tum chuan nangmah zawkin kalsan mai la, khuareiah tifuh i inti zawk ang.
5. Engamah hmaa “Ka hmangaih che,” a tih nghal ngawt chuan ring nghal mai suh. ‘Love at first sight’ an tih te hi thawnthu leh film velah chauh lo chuan a tak rama thleng tak tak chi a ni lo. Vawikhat inhmuha induhna leh in-itna hi hmangaihna a ni nghal mai lo. Hmangaihna chuan par chhuah turin than ve ngial a mamawh a nia. Chuvangin, hmangaih hma lutuk tu che mipa chu a rinhlelhawm tlat.
6. Harsatna ngah lutuk, mipa ve si eng lai pawha harsatna sawi reng mai, vanduai bik riaua inngai chi te bulah chuan i hlim tak tak thei dawn em ni! Chutiang mipa chuan an hma an sial duh a, anmahni dik lohna hmuh an harsatna duh bik.
7. Engkim mai a duh anga tih tum vek, a duh ang a nih dawn loh chuan titauh mai ching mipa hi an awm ve tlat. A duh apiang neih a tum a, midang te chu a thuhnuaiah daha a duh duha tihkual a tum thin. Chutiang mipa chu ngaizawng lo la i hlim zawk ang!
8. An hausakna leh an thil neih chhuang a, intivei thin mipa chuan hmeichhia a hnuaichhiah duh riau tih hrereng rawh.
9. Nute thuawih lutuk, engkimah ‘Ka nu,’ tih reng mai mipa chu a nu bulah awm reng mai rawh se. Thil tih dawn hleka nu te phalna lak phawt ngai chi mipa, a nu bula pangchang tlat mipa, chutiang mi chu kalsan zawk rawh. Innei pawh ni ula a nu chu in inkarah a awm reng dawn a, in hlim lohna thlentu a ni fo ang.
10. Mipa thawhchhuah nei lo, thatchhe bawk si, nu leh pa thawhchhuah ring, mahni intodelh tum bawk si lo nen chuan inhlim tak tak thei dawn em ni? Inngaihzawn lai chuan engmah harsatna a thlen lo mai thei che, mahse, in innei chiah ang a, a buai nghal nak mai ang!