Hmeichhe tan zu in a tha lo lehzual

Swedish scientist-te chuan zirchianna an neih thar zu in nasat hi mipa aiin hmeichhe tan a a tha lo lehzual niin an sawi a, zu hian hmeichhia thluaka serotonin system chu mipa thluak aiin a khawih chhe rang zawk niin an sawi.
Zirchianna neitu te chuan hmeichhe zu in nasaah chuan an thluaka serotonin system zu in a tihchhiat dan hi kum 4 vel atangin a lang tan niin an sawi a, chutih laiin mipaah chuan kum 12 vel atang a lang ve tan chauh, an ti.
Serotonin chu hormone pawimawh tak, kan mood (hlim leh hlim loh) control tu a ni.
University of Gothenburg, Sweden-a Department of Psychology leh Sahlgrenska Academy-a mithiam ten zirchianna hi neiin, an zinga mi Kristina Berglund chuan, “Neuroendocrine technique hmangin zirchianna hi kan kalpui a, hemi hmang hian zu in thluak a khawih dan kan hrechiang thei ta a. He system hian impulse control leh mood bakah thluak hnathawh dang a khawih dan te kan hre thei ta a ni,” a ti.
He zirchianna atanga an hmuh dan chuan hmeichhe zu in nasaah chuan kum 4 velah an serotonin system chu 50% vel zetin a tlahniam nghal a, chutih laiin mipaah chuan 50% a tlahniam tur chuan kum 12 vel a ngai ve thung.
Sahlgrenska Academy a mi Ulf Berggren chuan, “Hriat tur pawimawh chu mipa leh hmeichhiaah zu in a thil tihchhiat pawi dan hi a inang reng a, mahse, chutiang thlen thei tur chuan hun a induh rei hleih mai chauh a ni. Serotonin system hi amahin a insiam tha leh thei em tih pawh kan la hre bik lo. Mahse, research result thenkhat en chuan hun engemaw chen zu kan nghei chuan zu in kan thluak a lo tihchhiat tawh te chu ama tawkin a insiam tha ve leh mai thei a ni,” a ti.
He zirchianna chungchang hi journal Alcoholism: Clinical & Experimental Research-ah tihchhuah a ni.