Pawar-an Shiv Sainiks te phuba la turin ngen

Chief Minister Eknath Shinde kaihhruai Shiv Sena te chuan Bal Thackeray din Sena thanchhohnaah thawh engmah an nei lo tiin Maharashtra Leader of Opposition leh senior Nationalist Congress Party (NCP) leader Ajit Pawar chuan a sawi a. Shiv Sainiks te chu CM hlui Uddhav Thackeray paihtlaa Maha Vikas Aghadi (MVA) movement titlutu ‘phatsantu’ te lakah ‘phuba la’ turin a ngen.
“Sena MLA hel 40 te, Uddhav Thackeray phastan tute hian Shiv Sena thanchhohnaah engmah tih an nei lo. Thlan tlin an nihna chhan chu Bal Thackeray-an ticket a pek vang mai a ni. Bal Thackeray khan mi pangngai te kawtthlera tal mai mai te MLA leh MP ah te a hlangkai a, chung mite chuan Uddhav Thackeray phatsanin lohtheihlohin Chief Minister post chhuahsan lo thei lovin an siam a ni” tiin a sawi.
Pawar hian February 26 by election Chindwad (Pune district) a neih turah NCP (MVA) candidate Nana Kate tana campaign mekin a khingpui tur chu Ashwini Jagtap a ni a, rorel lai BJP leh Balasahebanchi Shiv Sena coalition tangrual candidate a ni.
Kasba Peth leh Chinchwad by election hi loh theih lohin BJP MLA tanglai Mukta Tilak leh Jagtap te an thih avanga neih ngai a ni a.
Pawar hi a campaign naah Shiv Sena (Uddhav Balasaheb Thackeray) leader Aaditya Thackeray leh State Congress chief Nana Patole ten an tawiawm a ni.
Pawar chuan Shinde kaihhruai rebel Balasahebanchi Shiv Sena faction te chu beiin tun hnai lawka Maharashtra Legislative Council (MLC) polls neihnaah pawh Shinde faction leh BJP te chuan seat nga awmah seat khat chauh lain mipui in an hrem a ti bawk a.
“Heng phatsantute hian Thackeray an phatsan a, inbumna hmangin sorkar an siam a ni. Bal Theckeray hruai Shiv Sena a nih lai pawh khan hel an awm thin a, chung hel te chuan inthlanah chakna an chang ngai lo. Balasaheb an Uddhav Thackeray amah aiawh tura a ruat tawh chuan eng nge phun zui ngaihna?” tiin Pawar chuan sawi bawkin Shiv Sainiks te chu Uddhav Thackeray a phatsan avangin Shinde faction te lakah phuba la turin a ngen zui a ni.
Maharashtra-ah hian MVA sorkar a ding reng thin a. Mahse, Shiv Sena MLA rual 40 lai te chuan Chief Minister Uddhav Thackeray lakah helin an titau a, hei vang hian sorkar chu paihthlaka awmin Shiv Sena MLA titau leh BJP MLA te tangrual chuan sorkar-na an siam zui ta a ni.