Hmeichhia humhimtu lal Zakapa chanchin zir

Directorate of Women & Child Development bultumin “Zakapa, Fanai lal” tih thupui hmangin Thawhtanni khan Aizawlah seminar neih a ni.
Seminar hmanpuitu Social Welfare minister Er Lalrinawma chuan Sailulak leh Khawhri lal huaisen Zakapa chanchin zira seminar buatsaih a ni chu lawmawm a tih thu a sawi a. Mizo hnam ziarang zahpui loa, chawinun zel a tul tiin, “Hnam ropui leh tha ber kan ni tih hi pawm tlat ang u,” a ti.Lal Zakapa hian South Lushai Hills District siam thara superintendent (bawrhsap) hmasa ber CS Murray (Marliana’n) nula mutpui tur a dil chu hnialin silaiin kah a tum phah hial a; hmeichhiate a zahna chu ngaihsan awm tak a ni, tih Er Lalrinawma hian sawiin, “Kan hnam chin dan a ni lo, tia a chhanna kha tunlai thangtharte tan entawntlak a ni,” a ti.
Seminar-ah hian resource person HC Thanchungnunga, Prof JV Hluna leh David R Lalsawmtluanga te paper buatsaih zirho a ni a. Sawiho zui niin, Aizawl Theological College leh college hrang hranga Mizo subject zirlai bakah NGO leh institution hrang hranga mithiamte an tel a ni.
Zakapa hi lal Dokhama fapa pali zinga pathumna niin, kum 1839-ah a piang a; Khawhri leh Sailulakah kum 20 chuang ve ve a lal hnuin 1914 December 28 khan kum 75 mi niin Sailulakah a thi a ni.
Mizoram Women & Child Development chuan hmeichhiate humhim leh chawikan lama thawhhlawkte tan ‘Zakapa Award’ a siam thar dawn a, mimal/ NGO/ institution tan dil theih a ni. Award dawngtute hnenah sumfai nuai khat leh citation hlan thin tur a ni.