Hmeichhiate hruaitu atan inchher chho turin duh

MHIP hruaitute chu khawtlang, ram leh kohhrana hruaitu ni tura inchher chho turin a duh tih ZPM consultant F Rodingliana chuan a sawi.
ZPM party-in Lengteng bial vil tura an ruat F Rodingliana hian Ningani khan MHIP Lamzawl Branch-in MHIP Day vawi 49-na lawm hmanpuiin, MHIP office building thar a sak sak a hawng nghal a ni.
MHIP-in hmeichhe dinhmun chawisan tumin hun rei tak atangin hma an la tawh thin a, an hmalakna in rah duhawm tak a chhuah mek zel tih a sawi. Zoram khawvelah hmeichhiaten a bikin ram hruai kawngah chanvo pawimawh tak an neih tak avangin khawtlang hruaitu ni tlaka inchher chhoh zel a pawimawh, tiin, an kar vang emaw an nawrna vang emaw pawhin khawtlang leh kohhran rorelnaah chanvo pawimawh tak an hauh thluah tawh a. An chanvo leh mawhphurhna an hnehsawhin, an tlin viaua a hriat thu a sawi.
Nute chu chhungkaw enkawltu ber an nih angin an pawimawh a, an mawhphurhna a sang em em a ni tih F Rodingliana hian a sawi a. Zirna leh khawtlang nun siamthat kawngah, ram leh hnam siamthat chungchangah, mi thenkhatin an sawi reng rengin, chhungkuaa bul tan, tih sawi a ni fo thin tih sawiin, “Chhungkaw enkawltu ber chu nute in ni a, in kutah thil zawng zawng a innghat a ni ber a. Nuten in zir chuan harsatna tam tak kan sutlang thei a, in zir loh erawh chuan buaina belhchhahtu mai kan ni dawn a ni,” a ti.