Hnam lam intihsiakah Kawllen Cultural Club

Mizo Zirlai Pawl-in Cheraw (Buhza-aih) leh Solakia/ Sawlakia hmanga hnam lam intihsiak a buatsaihah Kawllen Cultural Club chu pakhatna an ni.
MZP Gen. Hqrs. buatsaih ‘GIG Motors-MZP Hnam lam intihsiak’ hi Nilaini khan nei tanin Ningani khan zawh a ni a. A kharna hmanpuitu Art & Culture minister C Lalsawivunga chuan, ram changkang leh ropui apiangin an hnamzia leh nundan an ngaisang a. An hnam lam leh ziate an humhalh a, an chawisang thin, tiin, MZP-in hetiang hun a buatsaih chu lawmawm a ti a, rah tha a chhuah a ring tih a sawi a ni. Zirlaite chu kan hnam zia leh lam humhalh chungin an zirlai thlahthlam lo turin a fuih bawk.
MZP president H Lalthianghlima chuan, Mizote chu hnam tlem kan ni a, kan hnam nunzia tha kan humhalh a, hnam lam kan chhawmnun chu kan mawhphurhna a ni, tiin, hnam humhalh nan kan lam mawi tak takte chawisan MZP-in a duh avangin hetiang hun hi buatsaih a ni tih a sawi.
“Mizo hmeichhiaten hnamdang neih an intihhmuh emaw tih mai turin hnamdang an nei sup sup a. Chu’ng ho chu an rawn inpholang nasa em em bawk a. Kan hnam a boral loh nan Mizo ngei nupui pasalah nei ila, kan hnam humhalh ang u,” a ti bawk.
Hnam lam intihsiakah hian cultural club 12 an tel a. Pakhatna Kawllen Cultural Club hian lawmmanah sumfai Rs. 70000, pahnihna Mizo Cultural Club Vaivakawn-in Rs. 50000, pathumna Huiva Cultural Club Govt. Aizawl College-in Rs. 30000 an dawng a, trophy an dawng theuh bawk. A dang zawng hian Rs.3000 an dawng a ni.